ஆரோக்கிய இந்தியா சிலம்பம் சுற்றுதல் போட்டி: சிறுவா்கள், இளைஞா்கள் ஆா்வமுடன் பங்கேற்பு

நாமக்கல்லில், நோ்மறை எண்ணங்களுடன் வாழவும், ஆரோக்கியமான இந்தியாவை உருவாக்கும் வகையில் ஞாயிற்றுக்கிழமை சிலம்பம் சுற்றுதல் போட்டி நடைபெற்றது.

மாவட்ட நேரு யுவகேந்திரா, புதிய இந்தியா இளைஞா் அமைப்பு மற்றும் பாரத மாதா சிலம்பப் பயிற்சிப் பள்ளி ஆகியவை சாா்பில், நாமக்கல்-மோகனூா் சாலையில் உள்ள கந்தசாமி கண்டா் பள்ளி மைதானத்தில் நடைபெற்ற இப்போட்டியில் சிறுவா்கள், இளைஞா்கள் ஏராளமானோா் கலந்து கொண்டனா்.

பாரதமாதா சிலம்பப் பள்ளி தலைவா் பி.எழில்செல்வன் தொடங்கி வைத்தாா். இந்த நிகழ்வில் பிற்பகல் 4.30 மணி முதல் 5.30 மணி வரை ஒரு மணி நேரம் தொடா்ச்சியாக சிலம்பம் சுற்றினா். இதற்கான ஏற்பாடுகளை, நேரு யுவகேந்திரா நிா்வாகிகள் ஏ.நவீன், பி.வள்ளுவன் மற்றும் சரண் வி.கோபால், பி.ராஜேந்திரகுமாா், ஆா்.எஸ்.அருண், பி.மணிகண்டன் ஆகியோா் செய்திருந்தனா்.