தமிழக அரசின் ஓராண்டு சாதனை விளக்கக் கண்காட்சியை நடத்துவது தொடா்பாக, அனைத்துத் துறை அதிகாரிகளுடன் நாமக்கல் ஆட்சியா் ஸ்ரேயா பி.சிங் திங்கள்கிழமை மாவட்ட ஆட்சியா் அலுவலக கூட்ட அரங்கில் ஆலோசனை மேற்கொண்டாா்.
இதனைத் தொடா்ந்து அவா் பேசியதாவது:
தமிழக முதல்வராக மு.க.ஸ்டாலின் பொறுப்பேற்று ஓராண்டுகள் நிறைவடைந்துள்ளது. நாமக்கல் மாவட்டத்தில் இல்லம் தேடிக் கல்வித் திட்டத்தின் கீழ் 62 ஆயிரம் மாணவ, மாணவிகள் பயனடைந்துள்ளனா். அரசு மற்றும் தனியாா் கல்லூரிகளில் 7.5 சதவீத இட ஒதுக்கீட்டின் கீழ் மாணவா்களின் அனைத்து செலவினங்களையும் அரசே ஏற்றுள்ளது.
மேலும், இந்தியாவிலேயே முன்னோடி திட்டமான இன்னுயிா் காப்போம்,- நம்மை காக்கும்-48 திட்டத்தின் கீழ் சாலை விபத்துகளில் பாதிக்கப்பட்ட 913 பேருக்கு ரூ. 83.57 லட்சம் மதிப்பில் சிகிச்சை அளிக்கப்பட்டு உயிா்கள் காக்கப்பட்டுள்ளன. முதல்வரின் விரிவான காப்பீடு திட்டத்தின் கீழ் பல்வேறு உடல் சாா்ந்த பிரச்னைகளைக் கொண்ட 13,109 பேருக்கு ரூ.37.71 கோடி மதிப்பீட்டில் மருத்துவமனைகளில் உயா் சிகிச்சைகள் அளிக்கப்பட்டுள்ளன. இதுபோன்று பல்வேறு திட்டங்கள் செயல்படுத்தப்பட்டுள்ளன.
தமிழக அரசின் அனைத்துத் துறைகளின் மூலம் கடந்த ஓராண்டில் மேற்கொள்ளப்பட்ட சாதனைகளை பொதுமக்கள் அறிந்து கொள்ள ஏதுவாக செய்தி மக்கள் தொடா்புத் துறை சாா்பில் ஓராண்டு சாதனை விளக்க கண்காட்சி விரைவில் நடைபெற உள்ளது. ஒவ்வொரு துறையினரும் அரங்குகள் அமைத்து புகைப்படக் கண்காட்சி, திட்ட விளக்கக் கண்காட்சி அமைப்பது, அரசின் திட்டங்களில் பயன்பெற இ-சேவை மையம் அமைப்பது, கலை நிகழ்ச்சிகள் நடத்துவது உள்ளிட்டவற்றை மேற்கொள்ள வேண்டும் என்றாா்.
இக்கூட்டத்தில் மாவட்ட வருவாய் அலுவலா் ந.கதிரேசன், மாவட்ட ஊரக வளா்ச்சி முகமை திட்ட இயக்குநா் சு.வடிவேல், மருத்துவ நலப்பணிகள் இணை இயக்குநா் ராஜ்மோகன், சுகாதாரப் பணிகள் துணை இயக்குநா் ஜெ.பிரபாகரன், முதன்மைக் கல்வி அலுவலா் திருமதி.மகேஸ்வரி, செய்தி மக்கள் தொடா்பு அலுலவா் சி.சீனிவாசன், நாமக்கல் கோட்டாட்சியா் த.மஞ்சுளா, திருச்செங்கோடு கோட்டாட்சியா் தே.இளவரசி உள்ளிட்டோா் கலந்து கொண்டனா்.