முதல்வரின் சிறப்பு மருத்துவத் திட்ட முகாம்

ஓமலூர் அருகேயுள்ள வே.கொங்காரப்பட்டியில் முதல்வரின் சிறப்பு மருத்துவத் திட்ட முகாம் ஞாயிற்றுக்கிழமை நடைபெற்றது.

காடையாம்பட்டி வட்டாரத்துக்கு உள்பட்ட கே.என்.புதூர் ஆரம்ப சுகாதார நிலையப் பகுதியான வே.கொங்காரப்பட்டி புனித ஏஞ்சலா மெட்ரிகுலேசன் பள்ளியில் வட்டார மருத்துவ அலுவலர் மருத்துவர் சாதுபக்தசிங் தலைமையில் நடைபெற்ற மருத்துவ முகாமை ஓமலூர் சட்டப்பேரவை உறுப்பினர் பல்பாக்கி சி.கிருஷ்ணன் தொடக்கி வைத்தார்.

இந்த முகாமில் கே.என்.புதூர், வேப்பிலை, கொங்காரப்பட்டி உள்ளிட்ட பகுதிகளைச் சேர்ந்த ஆயிரத்துக்கும் மேற்பட்ட பொதுமக்கள் கலந்து கொண்டு முழு உடல்பரிசோதனை செய்து கொண்டனர்.

இதில், தீவிர சிகிச்சை தேவைப்படுவோருக்கு, மாவட்ட அரசுத் தலைமை மருத்துவமனைக்கு பரிந்துரை செய்து கடிதம் அளிக்கப்பட்டது. முகாம் தொடக்க விழாவில், மாவட்ட ஊராட்சிக்குழு உறுப்பினர்கள் சுப்பிரமணி, ஈஸ்வரி பாண்டுரங்கன், ஒன்றியக்குழு உறுப்பினர் மகாராஜன், சமுதாய சுகாதார செவிலியர் விஜயலட்சுமி, கே.என்.புதூர் மருத்துவ அலுவலர் பிரபு உள்பட பலர் கலந்து கொண்டனர்.