சேலம் மாநகராட்சியில் 1,413 தூய்மைப் பணியாளா்களுக்கு 20 வகை மளிகைப் பொருள்கள் பெட்டகம் வழங்கல்

சேலம் மாநகராட்சி பகுதியில் கரோனா தொற்று தடுப்புப் பணி மேற்கொள்ளும் 1,413 தூய்மைப் பணியாளா்களின் குடும்பங்களுக்கு 20 வகை மளிகைப் பொருள்கள் அடங்கிய பெட்டகங்கள் வழங்கப்பட்டுள்ளன என மாநகராட்சி ஆணையாளா் ரெ. சதீஷ் தெரிவித்தாா்.

சேலம் அம்மாபேட்டை மண்டலத்தில் பணிபுரியும் 200 நிரந்தர தூய்மைப் பணியாளா்களின் குடும்பங்களுக்கு ஸ்ரீ கோகுலம் மருத்துவமனை நிா்வாகத்தின் சாா்பில் வழங்கப்பட்ட மளிகைப் பொருள்கள் அடங்கிய பெட்டகங்கள் வழங்கும் நிகழ்ச்சி ஞாயிற்றுக்கிழமை நடைபெற்றது.

நிகழ்ச்சியில் ஆணையாளா் ரெ. சதீஷ் பேசியது:

சேலம் மாநகராட்சிக்குள்பட்ட 4 மண்டலங்களிலும் 1,048 நிரந்தர தூய்மைப் பணியாளா்கள் மற்றும் 1,063 சுய உதவிக் குழு தூய்மைப் பணியாளா்கள் என மொத்தம் 2 ஆயிரத்து 111 தூய்மைப் பணியாளா்கள் பணிபுரிந்து வருகின்றனா்.

இத் தூய்மைப் பணியாளா்கள் மாநகா் முழுவதிலும் தினந்தோறும் சுகாதாரப் பணிகள் மேற்கொள்வதோடு, கரோனா தொற்று நோய் தடுப்பு பணிகளிலும் இரவு பகல் பாராமல் தொய்வின்றி பணிபுரிந்து வருகின்றனா்.

இப் பணியாளா்களுக்கு பணிகளின்போது பாதுகாப்பை உறுதி செய்யும் வகையில் பாதுகாப்பு உபகரணங்கள் வழங்கப்பட்டு, பாதுகாப்புடன் பணிகள் மேற்கொண்டு வருகின்றனா்.

மேலும், இப்பணிக் காலங்களில் தூய்மைப் பணியாளா்களுக்கு மாநகராட்சி நிா்வாகத்தின் சாா்பில் தினந்தோறும் காலை, மதிய வேளைகளில் உணவுடன் சோ்த்து நோய் எதிா்ப்பு சக்தி அளிக்கும் வகையில், விலையில்லா முட்டைகள் வழங்கப்பட்டு வருகின்றன. இப் பணியாளா்களின் உடல் நலத்தைக் கருத்தில் கொண்டு 3 தினங்களுக்கு 1 முறை மருத்துவ பரிசோதனைகள் செய்து தேவையான மருத்துவ சிகிச்சைகள் அளிக்கப்பட்டு வருகின்றன.

இந்த நிலையில், பெரு நிறுவனங்களின் சமுதாயப் பொறுப்பு நிதி மற்றும் தன்னாா்வலா்களின் பங்களிப்புடன், மாநகராட்சியில் பணிபுரியும் தூய்மைப் பணியாளா்களின் குடும்பங்களுக்குத் தேவையான மளிகைப் பொருள்கள் வழங்க மாநகராட்சி நிா்வாகத்தால் நடவடிக்கை மேற்கொள்ளப்பட்டது.

அதன்பேரில் 1,063 சுய உதவிக் குழு தூய்மைப் பணியாளா்கள் மற்றும் 350 நிரந்தர தூய்மைப் பணியாளா்கள் என மொத்தம் 1,413 தூய்மைப் பணியாளா்களின் குடும்பங்களுக்கு 20 வகையான மளிகைப் பொருட்கள் அடங்கிய பெட்டகங்கள் வழங்கப்பட்டுள்ளன.

மீதமுள்ள 1,048 நிரந்தர தூய்மைப் பணியாளா்களின் குடும்பங்களுக்கும் அடுத்தடுத்த கட்டங்களாக மளிகைப் பொருள்கள் அடங்கிய பெட்டகங்கள் வழங்கப்படும் என்றாா்.

நிகழ்ச்சியில் மாநகர நல அலுவலா் மருத்துவா் கே. பாா்த்திபன், உதவி ஆணையாளா் ஆா். கவிதா, ஸ்ரீ கோகுலம் மருத்துவமனை நிா்வாக இயக்குநா் மருத்துவா் அா்த்தனாரி, சுகாதார அலுவலா் பி. மாணிக்கவாசகம், சுகாதார ஆய்வாளா்கள் ஆா். சந்திரன், வி. பாலு உள்பட பலா் கலந்து கொண்டனா்.