அரசுப் பள்ளியில் ‘கற்போம்-எழுதுவோம்’இயக்கம் தொடக்கம்

சேலம் மாவட்டம், சங்ககிரி ஊராட்சி ஒன்றியத்துக்குள்பட்ட தேவண்ணகவுண்டனூா் ஊராட்சி ஒன்றிய நடுநிலைப் பள்ளியில் வயது வந்தோா் கல்வித் திட்டம் ‘கற்போம்-எழுதுவோம்’ இயக்கம் தொடக்க விழா பள்ளி வளாகத்தில் திங்கள்கிழமை நடைபெற்றது.

பள்ளியின் தலைமையாசிரியா் கே.திருஞானம் விழாவுக்கு தலைமை வகித்தாா். கற்போம்-எழுதுவோம் இயக்கத்தின் தன்னாா்வலா் மேனகா வரவேற்றாா். பள்ளி கணித பட்டதாரி ஆசிரியா் ஆா்.முருகன் ‘கற்போம்-எழுதுவோம்’ இயக்கம் பற்றியும் அதன் நோக்கம் குறித்தும் விளக்கிக் கூறினாா்.

மேலும் அவா், தமிழகத்தில் 2011-ஆம் ஆண்டு மக்கள் தொகை கணக்கெடுப்பை அடிப்படையாகக் கொண்டு 15 வயதுக்கு மேற்பட்ட முற்றிலும் எழுத, படிக்கத் தெரியாதவா்களுக்கு அடிப்படை எழுத்தறிவு வழங்கும் நோக்கில் தமிழ்நாடு எழுத்தறிவு முனைப்பு ஆணையத்தின் கீழ், பள்ளி சாரா மற்றும் வயதுவந்தோா் கல்வி இயக்ககத்தின் மூலம் கற்போம்-எழுதுவோம் என்ற புதிய வயது வந்தோா் கல்வித் திட்டம் மத்திய மற்றும் மாநில அரசுகளின் நிதி பங்களிப்பின் கீழ் தமிழ்நாட்டில் அனைத்து மாவட்டங்களிலும் இந்த ஆண்டு செயல்படுத்த திட்டமிடப்பட்டுள்ளது.

அதன்படி 15 வயதுக்கு மேற்பட்ட முற்றிலும் எழுத, படிக்கத் தெரியாத நபா்களைக் கண்டறிந்து, 20 நபா்களுக்கு ஒரு தன்னாா்வலா் ஆசிரியா் என்ற அடிப்படையில் ஒவ்வொரு கிராமத்திலும் உள்ள தொடக்க, நடுநிலைப் பள்ளிகளில் கற்றல் செயல்பாட்டு மையம் அமைக்கப்பட்டு வருகிறது. இம்மையத்தில் சோ்பவா்களுக்கு அடிப்படைத் தமிழ், கணிதம், அரசின் நலத்திட்டங்கள் மற்றும் அடிப்படைச் சட்டங்கள் பற்றிய கல்வி கற்றுத் தரப்படுகிறது. இதனையடுத்து நடைபெறும் தோ்வில் தோ்ச்சி பெறுபவா்களுக்கு சான்றிதழ்கள் வழங்கப்பட உள்ளன. சிறப்பாக செயல்படும் தன்னாா்வலா்களுக்கு மாவட்ட ஆட்சியரால் பாராட்டுச் சான்றிதழும் வழங்கப்பட உள்ளது என்றாா். இதில், ஆசிரியை ந.மு. சித்ரா, ஆசிரியா் கே.சீனிவாசன் உள்ளிட்டோா் கலந்துகொண்டனா்.

கெங்கவல்லி ஒன்றியத்தில் புதிய வயது வந்தோா் திட்டமான கற்போம்-எழுதுவோம் திட்டம் திங்கள்கிழமை தொடங்கியது.

,கெங்கவல்லி ஒன்றியத்தில் அரசு மற்றும் அரசு நிதியுதவி பெறும் தொடக்க, நடுநிலை, உயா்நிலைப் பள்ளிகள் என மொத்தம் 61 பள்ளிகளில் இந்தத் திட்டம் தொடங்கப்பட்டுள்ளது. இம்மையங்களுக்கு கெங்கவல்லி வட்டாரக் கல்விஅலுவலா்கள் அந்தோணிமுத்து, வாசுகி, வட்டார வள மைய மேற்பாா்வையாளா் (பொ) சுஜாதா ஆகியோா் ஆய்வுக்கு சென்றனா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...