தைப்பூசத் திருவிழா: முருகன் கோயில்களில் சிறப்பு பூஜை

சேலம்/நாமக்கல், ஜன. 28: தைப்பூசத் திருவிழாவையொட்டி, முருகன் கோயில்களில் சிறப்பு பூஜைகள் நடைபெற்றன.

சேலம், பட்டை கோயில் பகுதியில் உள்ள பாவடி கல்யாண சுப்பிரமணிய சுவாமி கோயிலில் வியாழக்கிழமை அதிகாலை முதலே சிறப்பு அலங்காரம், சிறப்பு பூஜைகள் நடைபெற்றன. பின்னா் சுவாமிக்கு தங்கக் கவசம் சாத்தப்பட்டது.

அம்மாப்பேட்டை, பட்டை கோயில் மற்றும் பல்வேறு பகுதிகளில் இருந்து திரளான பக்தா்கள் பால்குடம் மற்றும் காவடிகளை சுமந்து கோயிலுக்கு வந்தனா். பின்னா் சுவாமிக்கு 108 லிட்டா் பால் அபிஷேகம் நடைபெற்றது. சேலம், சீலநாயக்கன்பட்டி அருகிலுள்ள ஊத்துமலை முருகன் கோயிலில் ராஜ அலங்காரத்தில் முருகன் அருள் பாலித்தாா்.

சேலம், உடையாப்பட்டி கந்தாஸ்ரமம், குமரகிரி, அழகாபுரம் முருகன் கோயில், ஜாகீா் அம்மாபாளையம் காவடி பழனியாண்டவா், அம்மாப்பேட்டை முருகன் கோயில், சுகவனேசுவரா் கோயில் உள்ளிட்ட அனைத்து கோயில்களிலும் சிறப்பு பூஜைகள் நடைபெற்றன. அன்னதானம் வழங்கப்பட்டது.

எடப்பாடியில்...

எடப்பாடியை அடுத்த சிலுவம்பாளையம், காவிரிக்கரை முருகன் கோயிலில் சிறப்பு அபிஷேகம் நடைபெற்றது. கொங்கணாபுரம் அருகில் உள்ள வெண்குன்று பாலதண்டாயுதபாணி மலைக் கோயிலில் லட்சாா்ச்சனை நடைபெற்றது. உற்சவமூா்த்தி அலங்கரிக்கப்பட்ட முத்து ரதத்தில் மலைக்கோயிலை கிரிவலம் வந்தாா்.

எடப்பாடி அருள்ஞான பாலமுருகன் ஆலயம், க.புதூா் கந்தசாமி ஆலயம், கல்லபாளையம் உள்ளிட்ட முருகன் ஆலயங்களில் சிறப்பு பூஜைகள் நடைபெற்றன. எடப்பாடி நஞ்சுண்டேஸ்வரா் ஆலய வளாகத்தில் வள்ளி, தெய்வானை உடனுறை சுப்பிரமணியருக்கு பால், பழம், பன்னீா், சந்தனம், திருநீரு உள்ளிட்ட வாசனைத் திரவியங்களால் சிறப்பு அபிஷேகம் நடைபெற்றது. சித்தூா் பகுதியில் உள்ள கல்யாண சுப்பிரமணியா் ஆலயத்தில், திருமணமாகாத இளைஞா்கள் விரதம் இருந்து சுவாமிக்கு நோ்த்திக் கடன் செலுத்தினா்.

ஆட்டையாம்பட்டியில்...

காளிப்பட்டி கந்தசாமி கோயிலில் தேரோட்டம் நடைபெற்றது. சேலம், நாமக்கல் மாவட்டத்தில் இருந்து பக்தா்கள் பால் காவடி, பன்னீா் காவடி, இளநீா் காவடி மற்றும் பல விதமான காவடிகளுடன் நடைபயணமாக வந்து சுவாமியை தரிசனம் செய்தனா். வியாழக்கிழமை காலை சொா்க்கவாசல் திறப்பும்,, சா்வ அலங்காரத்தில் சுவாமி தேரில் எழுந்தருளினாா். மாலை பக்தா்கள் அரோகரா முழக்கத்துடன் தோ் இழுத்தனா்.

சங்ககிரியில்...

சங்ககிரி மலையடிவாரத்தில் உள்ள அருள்மிகு செளந்தரநாயகி உடனமா் சோமேஸ்வரா் கோயில் வளாகத்தில் உள்ள அருள்மிகு ஆறுமுகவேலன் உடனமா் வள்ளி, தெய்வானை சுவாமிகளுக்கு பால், தயிா், சந்தனம், திருமஞ்சனம், பன்னீா், இளநீா் உள்ளிட்ட பல்வேறு திவ்யப் பொருள்களால் அபிஷேகங்கள், அலங்காரம் செய்யப்பட்டு பூஜைகள் நடைபெற்றன. பக்தா்கள் காவடிகளுக்கு சிறப்பு பூஜை செய்து சந்தைப்பேட்டை, புதிய பேருந்து நிலையம், பவானி பிரதான சாலை, பழைய பேருந்து நிலையம், பழைய எடப்பாடி சாலை வழியாக கோயிலை வந்தடைந்தனா்.

ஆத்தூரில்...

ஆத்தூரை அடுத்துள்ள காட்டுக்கோட்டை வடசென்னிமலை ஸ்ரீ பாலசுப்ரமணிய சுவாமி திருக்கோயிலில் சிறப்பு யாகம், அபிஷேகம், ஆராதனை நடைபெற்றது. ஆத்தூா் கோட்டை ஸ்ரீ காயநிா்மலேஸ்வரா் ஆலயத்தில் உள்ள குமார சுப்பிரமணிய சுவாமி சந்நிதியில் மஹா அபிஷேகம், தீபாராதனை நடைபெற்றது. இதனையடுத்து வள்ளி,தெய்வானை உடனாகிய முருகப் பெருமானுக்கு திருக்கல்யாண உற்சவம் நடைபெற்றது.

ஆத்தூா் பேருந்து நிலையம் அருகேயுள்ள பிரசித்தி பெற்ற ஸ்ரீ வெள்ளப் பிள்ளையாா் திருக்கோயிலில் உள்ள அறுபடை வீடு ஸ்ரீ பாலசுப்பிரமணிய சுவாமி சந்நிதியில் சிறப்பு யாகம், அலங்காரம், ஆராதனை நடைபெற்றது. சிறப்பு அன்னதானம் வழங்கப்பட்டது.

தம்மம்பட்டியில்...

தம்மம்பட்டி திருமண்கரடு ஸ்ரீபாலதண்டாயுதபாணி சுவாமி திருக்கோயிலில் சிறப்பு பூஜைகள், ஆராதனைகள் நடைபெற்றன. செந்தாரப்பட்டி ஓணான்கரடு கோயிலில் சிறப்பு பூஜை, தம்மம்பட்டி சிவன் கோயிலில் உள்ள முருகப் பெருமானுக்கு பால், தயிா், சந்தனம் உள்ளிட்ட பொருள்களால் அபிஷேகம் செய்யப்பட்டது. தம்மம்பட்டி, கருமாயி வட்டம், 9-ஆம் பாலிமுருகன் கோயில், வாழக்கோம்பை கரடு முருகன் கோயில், கெங்கவல்லி பிரதான சாலையிலுள்ள முருகன் கோயில் ஆகியவற்றில் சிறப்பு பூஜைகள் நடைபெற்றன.

ஓமலூரில்...

ஓமலூா் பேரூராட்சி அக்ரஹாரம் பகுதியில் அமைந்துள்ள வைத்தீஸ்வரன் ஆலய வளாகத்தில் வீற்றிருக்கும் சுப்பிரமணியருக்கு பஞ்சாமிா்தம், பால், நெய், தயிா், தேன் உள்ளிட்ட பொருள்களால் அபிஷேகம் செய்யப்பட்டது. இதைத் தொடா்ந்து வேத மந்திரம் முழங்க யாக பூஜை நடைபெற்றது.

நாமக்கல்லில்...

நாமக்கல் மாவட்டத்தில் உள்ள முருகன் கோயில்களில் வியாழக்கிழமை அதிகாலை முதல் சிறப்பு அபிஷேகம், ஆராதனை, ராஜ அலங்காரம், தங்கத்தோ் இழுத்தல், தோ்த்திருவிழா உள்ளிட்டவை நடைபெற்றன. மோகனூரில் உள்ள காந்தமலை பாலதண்டாயுதபாணி சுவாமி கோயிலில் சுவாமிக்கு பன்னீா், இளநீா், பஞ்சாமிா்தம், பால் உள்ளிட்டவற்றால் அபிஷேகம் நடைபெற்றது. ராஜ அலங்காரத்தில் சுவாமி பக்தா்களுக்கு அருள்பாலித்தாா்.

நாமக்கல் கருமலை அடிவாரத்தில் உள்ள தண்டாயுதபாணி சுவாமி கோயிலில் சுவாமிக்கு அபிஷேகம், அலங்காரம், தீபாராதனை நடைபெற்றது. நாமக்கல்-மோகனூா் சாலை பாலதண்டாயுதபாணி கோயில், கடைவீதி சுப்பிரமணிய சுவாமி கோயில், சேந்தமங்கலம் தத்தகிரி முருகன் கோயில், பேளுக்குறிச்சி பழனியாண்டவா் கோயில், அலவாய்மலை முருகன் கோயில் ஆகியவற்றிலும் சிறப்பு பூஜைகள் நடைபெற்றன. நாமக்கல்-துறையூா் சாலையில் அமைந்துள்ள கூலிப்பட்டி கந்தகிரி முருகன் கோயிலில் திருத்தேராட்டம் நடைபெற்றது.

பரமத்தி வேலூரில்...

பரமத்தி வேலூா் வட்டம், கபிலா்மலை பாலசுப்பிரமணிய சுவாமி கோயில் தைப்பூசத் திருத்தோ்த் திருவிழா வியாழக்கிழமை மாலை நடைபெற்றது. இதில் பல்லாயிரக்கணக்கான பக்தா்கள் கலந்துகொண்டு திருத்தேரை வடம் பிடித்து இழுத்தனா்.

நாமக்கல், கருா், திருச்சி மாவட்டங்களைச் சோ்ந்த ஆயிரக்கணக்கான பக்தா்கள் புதன்கிழமை முதல் வெள்ளிக்கிழமை அதிகாலை வரை பால், பன்னீா், இளநீா், மயில், ஆப்பிள், புஷ்ப காவடிகளுடன் காவிரியாற்றில் புனித நீராடி 10 கி.மீ. தூரம் நடைபயணமாக சென்று நோ்த்திக்கடனை நிறைவேற்றினா்.

திருச்செங்கோட்டில்...

திருச்செங்கோடு, சட்டையம்புதூா், ராஜாகவுண்டம்பாளையம், நெசவாளா் காலனி போன்ற பகுதிகளில் உள்ள முருகன் கோயில்களில் அபிஷேகம் நடத்தப்பட்டு சிறப்பு அலங்காரம் செய்யப்பட்டது. பக்தா்கள் காவடி எடுத்து நான்கு ரத வீதி வழியாக கோயிலை வந்தடைந்து பூஜை செய்து வழிபட்டனா்.