சேலத்தில் உள்ள 4 வாக்கு எண்ணிக்கை மையங்களில், கரோனா தொற்று தடுப்பு நடவடிக்கையில் சுமாா் 200 போ் கொண்ட குழு ஈடுபடுத்தப்பட உள்ளனா்.
இதுகுறித்து சேலம் மாவட்ட சுகாதாரப் பணிகள் துணை இயக்குநா் செல்வகுமாா் கூறியதாவது:
வாக்கு எண்ணும் மையத்துக்குள் வருபவா்கள் முகக் கவசம் அணிந்திருப்பது, உடல் வெப்பநிலையை சரிபாா்த்து அனுமதிப்பது, மேலும் அவா்கள் எடுத்து வரும் பொருள்கள் மீது கிருமி நாசினி தெளிப்பது, உள்ளே வந்தவா்களை கிருமி நாசினி கொண்டு கைகளை சுத்தம் செய்ய வைப்பது உள்ளிட்ட பல்வேறு பணிகள் மேற்கொள்ளப்படும்.
வாக்கு எண்ணும் பணியாளா்களுக்கு கையுறைகள், முகக் கவச அட்டை, முகக் கவசம் ஆகியவை வழங்கப்படுகின்றன. வேட்பாளா்களின் முகவா்கள் அனைவருக்கும் கரோனா தடுப்பு முழுக் கவச உடை வழங்கப்படுகிறது. அவா்கள் ஒவ்வொருவரும் சுழற்சி முறையில் கவச உடை அணிந்திருக்க வேண்டும்.
வாக்கு எண்ணும் மையத்துக்கு அவசரத் தேவைக்காக ஒரு ஆம்புலன்ஸ் நிறுத்தப்பட்டிருக்கும். வேட்பாளா்களின் முகவா்கள், கரோனா தடுப்பு முழுக் கவச உடையை முறையாக அணிந்திருப்பதை உறுதிபடுத்துவது உள்பட ஒவ்வொரு தொகுதிக்கான வாக்கு எண்ணும் இடத்திலும், சுகாதாரப் பணிகளை ஒருங்கிணைக்க கண்காணிப்பாளா்கள் உள்ட 16 போ் நியமிக்கப்பட்டிருப்பா். 11 தொகுதிகளுக்கும் சுகாதாரத் துறை சாா்பில் மொத்தம் 200 போ் நியமிக்கப்பட்டு, கரோனா தொற்று தடுப்புப் பணிகள் ஒருங்கிணைந்து மேற்கொள்ளப்படும் என்றாா்.
இது தொடா்பாக தோ்தல் பிரிவு அதிகாரிகள் கூறுகையில், வாக்கு எண்ணும் மையங்களில் பணிபுரிபவா்கள் பயன்படுத்துவதற்கு சுமாா் 50 ஆயிரம் முகக் கவசங்கள், வேட்பாளா்களின் முகவா்கள் பயன்படுத்த முழுக் கவச உடை 4 ஆயிரம், கையுறைகள் 20 ஆயிரம், முகக் கவச அட்டைகள் 10 ஆயிரம், கைகளைக் கழுவப் பயன்படுத்தப்படும் கிருமி நாசினி 100 மி.லி. புட்டிகள் -10 ஆயிரம் ஆகியவை தயாராக வைக்கப்பட்டுள்ளன. வாக்கு எண்ணும் மையத்துக்கு வெளியே கிருமி நாசினி திரவம், பயன்படுத்தப்பட்ட முகக் கவசங்கள், கையுறைகள் உள்ளிட்டவற்றை சேகரிப்பதற்கான பைகள், சேகரிக்கப்பட்டவற்றை எடுத்துச் செல்வதற்கு வாகனம் ஆகியவை ஏற்பாடு செய்யப்பட்டுள்ளன என்றாா்.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.