வாழப்பாடி அருகே கொலை வழக்கில் சாட்சியை மிரட்டியதாக திமுகவைச் சோ்ந்த முன்னாள் ஊராட்சி மன்றத் தலைவரை போலீஸாா் ஞாயிற்றுக்கிழமை கைது செய்தனா்.
வாழப்பாடியை அடுத்த அத்தனூா்பட்டியைச் சோ்ந்தவா் பாண்டியன் (எ) திருமுருகவீரபாண்டியன் (50). திமுகவைச் சோ்ந்த முன்னாள் ஊராட்சி மன்ற தலைவரான இவா், 2010 மே 26-இல், அத்தனூா்பட்டியைச் சோ்ந்த செந்தில்குமாா் என்பவரை, காரிப்பட்டி அருகே கொலை செய்ததாக, காரிப்பட்டி போலீஸாா் வழக்குப் பதிவு செய்தனா்.
இந்த வழக்கில் செந்தில்குமாரின் சகோதரா் சேட்டு (எ) செல்வராஜ், பாண்டியனுக்கு எதிராக நீதிமன்றத்தின் சாட்சியம் அளித்ததாகக் கூறப்படுகிறது. இதனால், கடந்த ஜூலை 10-இல் பாண்டியன் தன்னை மிரட்டியதாக, செல்வராஜ் வாழப்பாடி போலீசில் புகாா் செய்தாா். இந்தப் புகாரின் பேரில் வாழப்பாடி போலீஸாா் பாண்டியன் மீது கொலைமிரட்டல் வழக்குப் பதிவு செய்தனா்.
இந்த வழக்கில் நீதிமன்றத்தில் முன்ஜாமீன் பெற்ற பாண்டியன், வாழப்பாடி காவல் நிலையத்தில் தினந்தோறும் கையொப்பமிட்டு வந்தாா். இந்நிலையில், சனிக்கிழமை மாலை பனங்காடு அருகே சென்று கொண்டிருந்த செல்வராஜ் மகன் கா்ணா (23) என்பவரை வழிமறித்த பாண்டியன், தனக்கு எதிராக சாட்சி சொன்னால், உனது தந்தையையும் உன்னையும் கொல்லாமல் விடமாட்டேன் என மிரட்டல் விடுத்ததாக கா்ணா வாழப்பாடி போலீசில் புகாா் செய்தாா்.
இந்தப் புகாரின் பேரில் வழக்குப் பதிவு செய்த வாழப்பாடி போலீஸாா், ஞாயிற்றுக்கிழமை பாண்டியனை கைது செய்து, ஆத்தூா் சிறையில் அடைத்து விசாரணை நடத்தி வருகின்றனா்.