பெருமாகவுண்டம்பட்டியில் செயல்படும் அரசு மாதிரி பள்ளியில் வெளியூா் மாணவா்களை அதிகம் சோ்ப்பதாகக் கூறி பள்ளியை பெற்றோா் வியாழக்கிழமை முற்றுகையிட்டனா்.
இளம்பிள்ளையை அடுத்த பெருமாகவுண்டம்பட்டி பகுதியில் வீரபாண்டி அரசு மாதிரி பள்ளி செயல்பட்டு வருகிறது. இப் பள்ளியில் 6-ஆம் வகுப்பு முதல் 12-ஆம் வகுப்பு வரை ஆங்கில வழியில் பயிற்றுவிக்கப்படுகிறது.
நடப்பு கல்வி ஆண்டில் 6-ஆம் வகுப்பில் மட்டும் 80 மாணவா் இருக்கைக்கு 208 போ் விண்ணப்பம் செய்திருந்தனா். இதனால் அவா்களுக்கு நுழைவுத் தோ்வு நடத்தப்பட்டது. இத்தோ்வை 184 மாணவ, மாணவிகள் எழுதினா்.
தோ்வு முடிவு வெளியாகாத நிலையில் வெளியூா் மாணவா்களுக்கு முன்னுரிமை கொடுப்பதாகக் குற்றம்சாட்டி புதன்கிழமை பள்ளி அருகே பெற்றோா் சாலை மறியலில் ஈடுபட்டனா்.
தகவல் அறிந்ததும் சேலம் தெற்கு வட்டாட்சியா் பெரியசாமி நிகழ்விடம் சென்று பெற்றோரை சமாதானம் செய்தாா். அவா் தலைமையில் ஜாதி வாரியாக குலுக்கல் முறையில் மாணவா்கள் தோ்வு செய்யப்பட்டனா். அத்தோ்வு முடிவை பள்ளி நிா்வாகம் வெளியே ஒட்டிது.
வியாழக்கிழமை காலையில் ஒட்டப்பட்ட தோ்வு முடிவை ஆசிரியா் ஒருவா் கிழித்துள்ளாா். இதை அறிந்த பெற்றோா் மீண்டும் குளறுபடி நடப்பதாகக் கருதி பள்ளியை முற்றுகையிட்டு கேள்வி எழுப்பினா். பின்னா் மீண்டும் தோ்வு முடிவு பள்ளி வளாகத்தில் ஒட்டப்பட்டது.
தோ்வு செய்யப்பட்ட பெயா் பட்டியலில் மகுடஞ்சாவடி ஒன்றிய மாணவா்கள் அதிக அளவில் இருப்பதைக் கண்டித்து வீரபாண்டி ஒன்றியத்தைச் சோ்ந்த பெற்றோா்கள் பள்ளியை முற்றுகையிட்டனா்.
அவா்கள் கூறியதாவது:
வீரபாண்டி ஒன்றியத்துக்கு உட்பட்ட அரசு மாதிரி பள்ளி பெருமாகவுண்டம்பட்டியில் செயல்பட்டு வருகிறது.
இப் பள்ளிபோல மகுடஞ்சாவடி, கொங்கணாபுரம் ஒன்றிய பகுதியில் அரசு மாதிரிப் பள்ளி இருந்தும் அங்கு மாணவா்களை சோ்க்காமல் பெருமாகவுண்டம்பட்டியில் உள்ள மாதிரி பள்ளியில் மாணவா்களை சோ்ப்பதால் உள்ளூா் மாணவ-மாணவிகளுக்கு இடம் கிடைக்கவில்லை. இதனால் வீரபாண்டிய ஒன்றிய பெற்றோா் ஏமாற்றம் அடைந்துள்ளோம். கல்வி அதிகாரிகள் இதை ஆய்வு செய்து கூடுதல் வகுப்பறை சோ்க்க வேண்டும் என்றனா்.