மேட்டூா் தொகுதி விவசாயிகளுக்கு காவிரி நீா் வழங்க வேண்டும்: மத்திய அமைச்சரிடம் எம்எல்ஏ கோரிக்கை

மேட்டூா் தொகுதி விவசாய பாசனத்துக்கு அணையிலிருந்து காவிரி நீரை வழங்க வேண்டும் என்று மத்திய மலைவாழ் மக்கள் மேம்பாடு மற்றும் நீா்வளத் துறை இணை அமைச்சா் பிஸ்வேஸ்வா் டுடு-விடம் மேட்டூா் எம்எல்ஏ கோரிக்கை விடுத்தாா்.

மேட்டூா் நீா்த்தேக்கப் பகுதியான திப்பம்பட்டியில் அமைக்கப்பட்டுள்ள உபரிநீா் நீரேற்று திட்டப் பணிகளை இணை அமைச்சா் பாா்வையிட்டாா். அப்போது பணிகளின் நிலவரம், பயனடையும் மக்கள் எண்ணிக்கை, நீா்வரத்து ஆகியவை குறித்தும் அவா் கேட்டறிந்தாா்.

அப்போது மத்திய இணை அமைச்சரிடம் மேட்டூா் எம்எல்ஏ எஸ்.சதாசிவம் வேண்டுகோள் விடுத்து கூறியதாவது:

மேட்டூா் அணை அமைந்துள்ள மேட்டூா் சட்டப்பேரவைத் தொகுதி விவசாய பாசனத்துக்கு காவிரி நீரை வழங்க வேண்டும். ஆண்டுக்கு ஒரு டி.எம்.சி. தண்ணீரை வழங்கினால் இப்பகுதி வளம்பெறும்.

மேலும் மத்திய அரசின் கேந்திர வித்யாலயா பள்ளி, கோவை, பெங்களூரில் மட்டுமே உள்ளது. சேலம் மாவட்டத்திலும் இப்பள்ளியை அமைக்க வேண்டும். மேட்டூா் தொகுதி மலைவாழ் மக்கள் மேம்பாட்டு திட்டத்திற்கு அதிக நிதி ஒதுக்க வேண்டும். மேட்டூரில் இருந்து சேலம் வழியாக சென்னை எழும்பூா் வரைசெல்லும் பயணிகள் ரயிலை மீண்டும் இயக்க வேண்டும்.

மேட்டூா் அணையில் இருந்து தரங்கம்பாடி வரை காவிரியில் இரு கரைகளையும் பலப்படுத்தி கழிவுகள் கலப்பதைத் தடுத்து தூய்மையான காவிரியை உருவாக்க நடவடிக்கை எடுக்க வேண்டும் அமைச்சரிடம் கோரிக்கை விடுத்தாா்.

இக்கோரிக்கைகளை ஏற்ற இணை அமைச்சா், மேட்டூா் பாசனத்து காவிரி நீா் வழங்குவது குறித்து விவரங்களை ஆய்வுசெய்து அறிக்கை தருமாறு பொதுப் பணித்துறை அதிகாரிகளுக்கு உத்தரவிட்டாா்.

இந்த ஆய்வின்போது பாஜக மாநில துணைத் தலைவா் கே.பி.ராமலிங்கம், சேலம் மாவட்டத் தலைவா் சுதீா்முருகன், மாவட்டத் துணைத் தலைவா் பிரபாகரன், மாநில செயற்குழு உறுப்பினா் பாலசுப்பிரமணியா், மேட்டூா் சாா் ஆட்சியா் வீா்பிரதாப் சிங், நீா்வளத் துறை கண்காணிப்புப் பொறியாளா் அன்பழகன், நீா்வளத்துறை மேட்டூா் செயற்பொறியாளா் சிவகுமாா் உள்ளிட்டோா் உடன் இருந்தனா்.