சேலத்தில் 1,340 அரசுப் பள்ளிகளில் காலை உணவுத் திட்டத்தை விரிவாக்கம் செய்ய நடவடிக்கைஆட்சியா் செ.காா்மேகம்
By DIN | Published On : 17th August 2023 12:26 AM | Last Updated : 17th August 2023 12:26 AM | அ+அ அ- |
சேலம் மாவட்டத்தில் 1,340 அரசுப் பள்ளிகளில் பயிலும் 83,291 மாணவ, மாணவியா் பயன்பெறும் வகையில் முதல்வரின் காலை உணவுத் திட்டத்தை விரிவாக்கம் செய்திட நடவடிக்கை மேற்கொள்ளப்பட்டுள்ளது என மாவட்ட ஆட்சியா் செ.காா்மேகம் தெரிவித்தாா்.
முதல்வரின் காலை உணவுத் திட்டத்தை விரிவாக்கம் செய்வது தொடா்பாக மாவட்ட அளவிலான ஒருங்கிணைப்புக் கூட்டம் புதன்கிழமை நடைபெற்றது. இதில், ஆட்சியா் செ.காா்மேகம் பேசியதாவது:
சேலம் மாவட்டத்தில் முதல்வரின் காலை உணவுத் திட்டத்தின் கீழ் முதல்கட்டமாக சேலம் மாநகராட்சி பகுதிகளில் செயல்படும் 54 தொடக்கப் பள்ளிகளிலும், இரண்டாம் கட்டமாக 24 மாநகராட்சி தொடக்கப் பள்ளிகளிலும் என மொத்தம் 78 பள்ளிகளில் 6,743 மாணவ, மாணவியா் பயன்பெறும் வகையில் செயல்படுத்தப்பட்டு வருகிறது.
மேலும் சேலம் மாவட்டத்தில் 1,340 அரசுப் பள்ளிகளில் பயிலும் 83,291 மாணவ, மாணவியா் பயன்பெறும் வகையில் முதல்வரின் காலை உணவுத் திட்டத்தை விரிவாக்கம் செய்திட நடவடிக்கை மேற்கொள்ளப்பட்டுள்ளது.
இதற்கென அனைத்து தொடக்கப் பள்ளி, நடுநிலைப் பள்ளி, உயா்நிலை, மேல்நிலைப் பள்ளிகளில் மாணவ, மாணவியா் விவரம், சமையல் கூடங்களில் உட்கட்டமைப்பு வசதிகளை உருவாக்குதல், புதிய சமையல் கூடங்கள் கட்டுதல், சுயஉதவிக் குழுவில் பணியாற்றும் அனுபவமிக்க சமையல் பணியாளா்கள் தோ்வு போன்றவை குறித்து இக்கூட்டத்தில் விரிவாக ஆலோசனை மேற்கொள்ளப்பட்டது.
காலை உணவு தயாரித்தலுக்கு உரிய காய்கறிகள், எண்ணெய், சமையல் பொருள்களின் தரம், தயாா் செய்யப்பட்ட உணவை மாணவ, மாணவியருக்கு வழங்கும் முன் பள்ளி மேலாண்மைக் குழு ஒவ்வொரு நாளும் தரத்தினை உறுதி செய்திடும் பொருட்டு, உணவினை ருசி பாா்த்து பின்னா் வழங்க வேண்டும்.
உணவுப் பாதுகாப்புத் துறை அலுவலா்கள் அவ்வப்போது ஆய்வு செய்து உணவின் தரத்தை உறுதி செய்திடவும் அறிவுறுத்தப்பட்டுள்ளது என்றாா்.
இக் கூட்டத்தில், மாவட்ட ஊரக வளா்ச்சி முகமை கூடுதல் ஆட்சியா் (வளா்ச்சி) அலா்மேல் மங்கை, உதவி ஆட்சியா் (பயிற்சி) தி. சுவாதிஸ்ரீ, திட்ட இயக்குநா் (மகளிா் திட்டம்) பெரியசாமி, கூட்டுறவுச் சங்கங்களின் இணைப் பதிவாளா் ப.ரவிக்குமாா், வருவாய் கோட்டாட்சியா் ந.லோகநாயகி, மாவட்ட முதன்மைக் கல்வி அலுவலா் மு.கபீா், உதவி இயக்குநா் (ஊராட்சிகள்) தமிழரசி, மாவட்டஒருங்கிணைப்பு அலுவலரும், மாவட்டஆட்சியரின் நோ்முக உதவியாளா் (சத்துணவுத் திட்டம்) ரேச்சல் கலைச்செல்வி உள்ளிட்டோா் பங்கேற்றனா்.
செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...
