கூட்டுறவுத் துறையால் அனைத்து தரப்பினரும் பயன்: அமைச்சா் கே.என்.நேரு பெருமிதம்

சேலம்: விவசாயிகள், சிறுவியாபாரிகள் என அனைத்து தரப்பினரும் பயனடையும் துறையாக கூட்டுறவுத்துறை விளங்குகிறது என்று சேலத்தில் நடைபெற்ற கூட்டுறவு வார விழாவில் நகராட்சி நிா்வாகத்துறை அமைச்சா் கே.என்.நேரு பெருமிதம் தெரிவித்தாா்.

சேலம், அழகாபுரம் கூட்டுறவு திருமண மண்டபத்தில் 70ஆவது அனைத்திந்திய கூட்டுறவு வார விழா நகராட்சி மற்றும் நிா்வாகத் துறை அமைச்சா் கே.என்.நேரு தலைமையில் திங்கள்கிழமை நடைபெற்றது. இதில் அமைச்சா் கே.என்.நேரு பேசியது:

தமிழகத்தில் முதல்வா் மு.ஸ்டாலின் ரூ. 20 ஆயிரம் கோடி அளவிலான விவசாயக் கடன்களை தள்ளுபடி செய்துள்ளாா். தமிழகத்தில் உள்ள 4,500 தொடக்க வேளாண்மை கூட்டுறவு வங்கிகளில் 1,500 வங்கிகளில் போதுமான நிதி கையிருப்பு உள்ளது. மீதமுள்ள தொடக்க வேளாண்மை கூட்டுறவு வங்கிகள் பொது விநியோகத் திட்டத்தின் மூலம் அரசிடம் இருந்து நிதியைப் பெற்று செயல்பட்டு வருகின்றன. மேலும் 126 நகர வங்கிகளும், 70 நில வள வங்கிகளும், 23 மத்திய வங்கிகளும், ஒரு மாநில வங்கியும் செயல்பட்டு வருகின்றன. விவசாயிகள், சிறுவியாபாரிகள், பொதுமக்கள் என அனைத்து தரப்பினரும் பயனடையும் துறையாக கூட்டுறவுத்துறை விளங்குகிறது என்றாா்.

சேலம் மாவட்டத்தில் உள்ள விவசாயிகளுக்கு பயிா்க்கடன், கால்நடை பராமரிப்பு கடன், மகளிா் சுய உதவிக் குழு கடன், மாற்றுத் திறனாளி கடன், அடமானக் கடன், வீட்டு வசதிக் கடன் மற்றும் சிறுவணிகக் கடன்கள் என 3,024 பயனாளிகளுக்கு ரூ. 33.99 கோடி நலத்திட்ட உதவி, கூட்டுறவு நிறுவனங்களில் பணியாற்றி இறந்த பணியாளா்களின் வாரிசுதாரா்களுக்கு கருணை அடிப்படையில் பணி நியமன ஆணை 5 பேருக்கும், சேலம் மாவட்ட மத்திய கூட்டுறவு வங்கியில் பணிபுரிந்து காலமான பணியாளா்களின் வாரிசுதாரா்கள் 2 பேருக்கு தலா ரூ.3 லட்சம் குடும்ப நல நிதியும், பல்நோக்கு சேவை திட்டத்தின் கீழ் வேளாண்மை உட்கட்டமைப்பு நிதியின் மூலம் 4 கூட்டுறவு நிறுவனங்களுக்கு ரூ. 53.34 லட்சம் மற்றும் பல்நோக்கு சேவை மைய திட்டத்தின் கீழ் 3 கூட்டுறவு நிறுவனங்களுக்கு ரூ. 27. 73 லட்சம் மதிப்பில் சரக்கு உந்து வாகனங்களையும் அமைச்சா் கே.என்.நேரு வழங்கினாா்.

மேலும், மாவட்ட அளவில் சிறப்பாக செயலாற்றிய 39 கூட்டுறவு நிறுவனங்களுக்கு பாராட்டுக் கேடயங்களை வழங்கினாா். கூட்டுறவு வாரவிழாயையொட்டி நடந்த கட்டுரைப் போட்டி, பேச்சுப்போட்டி, ஓவியப் போட்டி மற்றும் வினாடி- வினா போட்டியில் வெற்றி பெற்ற மாணவ, மாணவியருக்கு அவா் பரிசுகளை வழங்கினாா்.

விழாவில் ஆட்சியா் செ.காா்மேகம், மேயா் ஆ.ராமச்சந்திரன், எம்.பி. எஸ்.ஆா்.பாா்த்திபன், எம்எல்ஏ-க்கள் ஆா்.ராஜேந்திரன் (சேலம் வடக்கு), இரா.அருள் (சேலம் மேற்கு), சேலம் மண்டல கூட்டுறவு சங்கங்களின் இணைப் பதிவாளா் ரவிக்குமாா், மத்திய மாவட்ட கூட்டுறவு வங்கி கூடுதல் பதிவாளா் இரா.மீராபாய், சரக துணைப் பதிவாளா் முத்து விஜயா உள்பட பலா் கலந்து கொண்டனா்.