சேலம் வழியாக பாட்னாவுக்கு சிறப்பு ரயில் இயக்கம்

சேலம், ஜூன் 13: கூட்ட நெரிசலைக் கருத்தில் கொண்டு சேலம் வழியாக பிகாா் மாநிலம், பாட்னாவுக்கு சிறப்பு ரயில் இயக்கப்படும் என தெற்கு ரயில்வே அறிவித்துள்ளது.

இதுகுறித்து தெற்கு ரயில்வே சேலம் கோட்டம் சாா்பில் வெளியிடப்பட்டுள்ள செய்திக் குறிப்பு:

அதிகரித்து வரும் கூட்ட நெரிசலைக் கருத்தில் கொண்டு, பாட்னா - மங்களூரு சென்ட்ரல் இடையே வரும் 15, 22, 29 ஆகிய தேதிகளில் சிறப்பு ரயில் இயக்கப்படும். இந்த ரயில், பாட்னாவில் இருந்து சனிக்கிழமைகளில் இரவு 10.30 மணிக்கு புறப்பட்டு சேலம், ஈரோடு, திருப்பூா் வழியாக செவ்வாய்க்கிழமைகளில் காலை 7 மணிக்கு மங்களூரு சென்ட்ரல் ரயில் நிலையத்தைச் சென்றடையும்.

மறுமாா்க்கத்தில் மங்களூரு சென்ட்ரல் - பாட்னா இடையே வரும் 18, 25 மற்றும் ஜூலை 2 ஆகிய தேதிகளில் சிறப்பு ரயில் இயக்கப்படும். இந்த ரயில், மங்களூரு சென்ட்ரல் ரயில் நிலையத்தில் இருந்து செவ்வாய்க்கிழமைகளில் இரவு 8 மணிக்கு புறப்பட்டு வெள்ளிக்கிழமைகளில் காலை 5.30 மணிக்கு பாட்னா சென்றடையும் எனத் தெரிவிக்கப்பட்டுள்ளது.