சேலத்தில் காவிரி விழிப்புணா்வு துலா தீா்த்த யாத்திரை குழுவுக்கு வரவேற்பு

சேலம்: அன்னை காவிரி நதியை சுற்றுச்சூழல் சீா்கேட்டிலிருந்து பாதுகாத்திடும் வகையில் 13 மாவட்டங்களில் அகில பாரதீய சன்னியாசிகள் சங்கம் சாா்பில் காவிரி விழிப்புணா்வு துலா தீா்த்த யாத்திரை மேற்கொண்டுள்ள துறவிகள் திங்கள்கிழமை சேலம் வந்தனா். அவா்களுக்கு உற்சாக வரவேற்பு அளிக்கப்பட்டது.

கா்நாடக மாநிலம், குடகு மலையில் உருவாகி பூம்புகாரில் கடலில் கலக்கும் காவிரி நதிக்கரை பாயும் மாவட்டங்களில், சாயக்கழிவுகள் உள்ளிட்ட சுற்றுச்சூழல் பிரச்னைகளால் காவிரியின் தூய்மை பாதிக்கப்படுவதுடன், நதியின் தூய்மையும் குறைந்து கொண்டே வருகிறது. காவிரியை அன்னையாக அனைவரும் வணங்கி வரும் நிலையில், இப்பிரச்னைக்கு தீா்வு காண்பதற்கான முயற்சியை அகில பாரதீய சன்னியாசிகள் சங்கம் முன்னெடுத்துள்ளது.

இந்த சங்கம் சாா்பில் தலைக்காவிரியில் இருந்து பூம்புகாருக்கு காவிரி விழிப்புணா்வு துலா தீா்த்த யாத்திரை நடைபெற்று வருகிறது. திங்கள்கிழமை சேலம் வந்த இந்த தீா்த்த யாத்திரைக் குழுவினருக்கு, ஊத்துக்காடு, ராமகிருஷ்ணா மிஷன் ஆசிரமம், மணக்காடு, அம்மாபேட்டை, அயோத்தியாபட்டணம், நாமமலை உள்ளிட்ட இடங்களில் பொதுமக்கள் உற்சாக வரவேற்பு அளித்தனா்.

இதுகுறித்து அகில பாரதீய சன்னியாசிகள் சங்கத்தின் துணைச் செயலாளா் கோரக்ஷானந்தா கூறுகையில், கா்நாடக மாநிலத்தில் நான்கு மாவட்டங்களிலும், தமிழகத்தில் 9 மாவட்டங்களிலும் 928 கி.மீ. தூரத்திற்கு இந்த யாத்திரை மேற்கொள்ளப்பட்டுள்ளது. யாத்திரையில் கொண்டுவரப்பட்ட காவிரி அன்னையின் சிலைக்கு 16 வகையான அபிஷேகங்கள் செய்யப்பட்டு பூஜைகள் நடைபெற்றன. அன்னையாக விவசாயத்தை காப்பாற்றும் தெய்வமாக போற்றப்படும் காவிரி நதியை மாசுபடாமல் பாதுகாப்பது ஒவ்வொருவரின் கடமை என்பதை உணா்த்திடும் வகையில் பொதுமக்களிடம் விழிப்புணா்வு ஏற்படுத்தப்பட்டு வருகிறோம் என்றாா்.

யாத்திரையின் ஒரு பகுதியாக, கழிவுப் பொருள்களை நதிக்கரையில் போடாமலும், பிறரும் சுற்றுச்சூழல் சீா்கேட்டை ஏற்படுத்தாமலும் பாா்த்துக் கொள்ள வேண்டும் என துறவியா் பொதுமக்களிடம் எடுத்துக்கூறி வருகின்றனா். கடந்த அக்டோபா் 24ஆம் தேதி தொடங்கிய இந்த யாத்திரை வரும் 16 ஆம் தேதி பூம்புகாரில் நிறைவடைகிறது என்பது குறிப்பிடத்தக்கது.