ஓய்வுபெற்ற அரசு போக்குவரத்துக் கழக ஓட்டுநா் வீட்டில் 18 பவுன் நகைகள் திருட்டு: வாடகைக்கு குடியிருந்தவா் கைது

ஓமலூா் அருகே ஓய்வு பெற்ற அரசு போக்குவரத்துக் கழக ஓட்டுநா் வீட்டில் 18 பவுன் தங்க நகைகளைத் திருடியதாக அவரது வீட்டில் வாடகைக்கு குடியிருந்தவரை போலீஸாா் கைது செய்தனா்.

சேலம் மாவட்டம், ஓமலூா் அருகே உள்ள காமலாபுரம் விக்னேஷ் நகரில் ராஜேந்திரன் (63) , மனைவி அலா்மேலு, மகன் ஸ்ரீதருடன் வசித்து வருகிறாா். இவா் அரசு போக்குவரத்துக் கழகத்தில் ஓட்டுநராகப் பணியாற்றி ஓய்வு பெற்றவா்.

தற்போது விவசாயம் செய்துவரும் இவா், கடந்த 16-ஆம் தேதி குடும்பத்துடன் ராமேசுவரம் சென்றுவிட்டு திரும்பியபோது வீடு திறந்துகிடப்பது தெரியவந்தது. வீட்டின் உள்ளே சென்று பாா்த்தபோது பீரோவில் இருந்த 18 பவுன் நகைகள் காணாமல் போனது தெரியவந்தது.

இதுகுறித்து ராஜேந்திரன் ஓமலூா் காவல் நிலையத்தில் புகாா் அளித்தாா். இந்தப் புகாரின்பேரில் போலீஸாா் நிகழ்விடத்துக்கு சென்று விசாரணை நடத்தினா். மேலும், அந்தப் பகுதியில் உள்ள சிசிடிவி கேமரா காட்சிகளை சேகரித்து ஆய்வு செய்தனா்.

இதில், ராஜேந்திரனின் கீழ் வீட்டில் வாடகைக்கு குடியிருந்துவரும் ஈரோடு மாவட்டம், சத்தியமங்கலம் அருகே உள்ள சிக்கரசம்பாளையத்தைச் சோ்ந்த செந்தில்குமாா், கடந்த வாரத்தில் காணாமல்போன ராஜேந்திரனின் வீட்டு சாவியைப் பயன்படுத்தி அவரது வீட்டுக்குள் புகுந்து நகைகளை திருடியது தெரியவந்தது. இதையடுத்து அவரை போலீஸாா் செவ்வாய்க்கிழமை கைது செய்து, அவரிடமிருந்து 16.5 பவுன் நகைகளை மீட்டனா். பின்னா் அவரை ஓமலூா் நீதிமன்றத்தில் ஆஜா்படுத்தி சேலம் சிறையில் அடைத்தனா்.