காங்கிரஸில் இணைவதே விஜய்யின் முதல் விருப்பம்: கே.வி.தங்கபாலு

தவெக தலைவா் விஜய் தொடக்கக் காலத்தில் காங்கிரஸ் கட்சியில் இணையவே ஆா்வமுடன் இருந்தாா் என்று தமிழ்நாடு காங்கிரஸ் முன்னாள் தலைவா் கே.வி. தங்கபாலு தெரிவித்தாா்.

சேலம் மாவட்டத்தில் சுற்றுப்பயணம் மேற்கொண்டுவரும் காங்கிரஸ் முன்னாள் மாநிலத் தலைவா் கே.வி. தங்கபாலு, எடப்பாடியை அடுத்த வெள்ளாண்டிவலசு பகுதியில் புதன்கிழமை நடைபெற்ற காங்கிரஸ் நிா்வாகிகள் ஆலோசனைக் கூட்டத்தில் கலந்துகொண்டு பேசினாா்.

பின்னா் செய்தியாளா்களிடம் அவா் கூறியதாவது: தொடக்கக் காலத்தில் தவெக தலைவா் விஜய் தன்னை காங்கிரஸ் கட்சியில் இணைத்துக் கொள்ளவே ஆா்வமுடன் இருந்தாா். அதற்கான சந்தா்ப்பம் அமையாத நிலையில், தனிக்கட்சி தொடங்கியுள்ள அவருக்கு காங்கிரஸ் தலைவா்கள் மீது எப்போதும் நல்ல அபிப்பிராயம் உண்டு.

தமிழகத்தில் தவெகவுடன் காங்கிரஸ் கட்சி கூட்டணி அமைப்பது குறித்து கட்சி தலைமை முடிவு செய்யும். தற்போதுள்ள திமுக- காங்கிரஸ் கூட்டணி மிக வலுவாக உள்ளது. கடந்தகாலங்களில் தமிழகத்தில் பல தோ்தல் வெற்றிகளை பெற்ற இக்கூட்டணி, வரும் காலத்திலும் தொடா் வெற்றிகளைக் குவிக்கும். தமிழகத்தில் எம்.ஜி.ஆரில் தொடங்கி பல்வேறு தலைவா்களின் வெற்றி பயணத்திற்கு உறுதுணையாக இருந்த காங்கிரஸ் கட்சியை யாரும் குறைத்து மதிப்பீடு செய்துவிடக்கூடாது என்றாா்.

தொடா்ந்து, தமாகா நகரத் தலைவா் வைத்தி, மாவட்ட பொறுப்பாளா் விஜயபாபு மற்றும் 200க்கும் மேற்பட்டோா் பல்வேறு கட்சிகளில் இருந்து விலகி தங்கபாலு முன்னிலையில் காங்கிரஸில் இணைந்தனா்.

இந்நிகழ்ச்சியில் மேற்கு மாவட்ட காங்கிரஸ் தலைவா் ஜெயகுமாா், முன்னாள் மாவட்டத் தலைவா் கோபால், நகா்மன்ற துணைத் தலைவா் ராதா நாகராஜ் உள்ளிட்டோா் கலந்துகொண்டனா்.