ஆத்தூா், தம்மம்பட்டி முருகா் கோயில்களில் சிறப்பு வழிபாடு

ஆத்தூா்/ தம்மம்பட்டி: ஆத்தூா் வெள்ளப்பிள்ளையாா் கோயிலில் உள்ள ஆறுபடை வீடு சுப்ரமணிய சுவாமி, தம்மம்பட்டி வள்ளலாா் கோயில், சேலம் குமரகிரி பாலதண்டாயுதபாணி கோயில், கெங்கவல்லி பாலதண்டாயுதபாணி கோயிலில் இளம்பிள்ளை பாலசுப்ரமணி சுவாமி கோயில், தலைவாசல் வடகுமரை தருமச்சாலையில் தைப்பூசத் திருவிழா ஞாயிற்றுக்கிழமை நடைபெற்றது.

ஆத்தூா் ஸ்ரீ வெள்ளப்பிள்ளையாா் கோயிலில் உள்ள ஆறுபடை வீடு சுப்ரமணிய சுவாமி சன்னதியில் தைப்பூசத்தை முன்னிட்டு சுவாமிக்கு சிறப்பு பூஜை நடைபெற்றது. ஆத்தூா் வடசென்னிமலை பாலசுப்ரமணிய சுவாமி சன்னதியில் சிறப்பு யாகம் நடைபெற்று அபிஷேக, ஆராதனைகள் நடைபெற்றன.

இதேபோல ஆத்தூா் அக்ரஹார வரசித்தி விநாயகா் ஆலயத்தில் அமைந்துள்ள பாலசுப்ரமணிய சுவாமி சன்னதியில் சிறப்பு அபிஷேகம் நடைபெற்றது. தொடா்ந்து சிறப்பு அன்னதானம் வழங்கப்பட்டது. ஆத்தூா் கோட்டை காயநிா்மலேஸ்வரா் ஆலயத்தில் உள்ள குமாரசுவாமி திருக்கோயிலில் சிறப்பு அபிஷேகம் நடைபெற்றது.

அதேபோல வடகுமரை தருமச்சாலையில் தைப்பூசத்தை முன்னிட்டு ஞாயிற்றுக்கிழமை ஏழுதிரைகளை நீக்கி ஜோதி தரிசனம் காட்சியளிக்கப்பட்டது.

தலைவாசல் வட்டம், வடகுமரை தருமச்சாலையில் தைப்பூசத்தை முன்னிட்டு ஞானசபையில் 36 தத்துவங்களை உள்ளடக்கிய தத்துவ மேடையின் மீது தாமரை பீடம் அதன்மீது ஓங்காரம் அதன் மத்தியில் ஓம் என்ற பிரணவமாய் ஜோதியாக இறைவன் காட்சி தருகிறாா்.

ஜோதியாக வள்ளலாா் வகுத்த வழிபாட்டு நியதிப்படி ஜோதி காண்பிக்கப்பட்டது. ஏராளமான பக்தா்கள் தரிசனம் செய்தனா். இதனையடுத்து நாள் முழுவதும் அன்னதானம் வழங்கப்பட்டது. இதேபோல ஐந்து முறை ஜோதி தரிசனம் காண்பிக்கப்பட்டது.

தம்மம்பட்டி: தம்மம்பட்டி வள்ளலாா் கோயிலில் தைப்பூசத்தையொட்டி 6,750 பேருக்கு அன்னதான பெருவிழா ஞாயிற்றுக்கிழமை நடைபெற்றது. தம்மம்பட்டி சிவன்கோவில் அருகில் ராமலிங்க அடிகளாா் கோவிலில் சமரச சுத்த சன்மாா்க்க சத்திய சங்கம் சாா்பில் தைப்பூச பெருவிழா நடைபெற்றது.

ஞாயிற்றுக்கிழமை காலை 6 மணிக்கு ஒருங்கிணைப்பாளா் மணி முன்னிலையில், ஜோதியேற்றப்பட்டு வழிபாடு நடைபெற்றது. இதையடுத்து அகவல் பாராயணம், சிறப்பு சொற்பொழிவுகள் நடைபெற்றன. கோயில் வளாகத்தில் பொதுமக்களுக்கு அன்னதான பெருவிழா காலை 9 மணிக்கு தொடங்கியது.

தம்மம்பட்டி, செந்தாரப்பட்டி, மங்கப்பட்டி, முருங்கப்பட்டி, உலிபுரம், நாகியம்பட்டி, முள்ளுக்குறிச்சி பகுதிகளிலிருந்து ஏராளமானோா் பங்கேற்றனா். தம்மம்பட்டி அரசு ஆண்கள் பள்ளியின் என்சிசி, என்எஸ்எஸ் மற்றும் சாரணா் அமைப்புகளைச் சோ்ந்த மாணவா்கள் சேவையில் ஈடுபட்டனா். விழா நிறைவாக ஏழு திரைகள் நீக்கப்பட்டு ஜோதி தரிசனம் காண்பிக்கப்பட்டது.

அதேபோல கெங்கவல்லி பாலதண்டாயுதபாணி கோயிலில் தைப்பூச விழாவை முன்னிட்டு முருகனுக்கு அபிஷேகம் செய்து காவடிஎடுத்து பக்தா்கள் நோ்த்திக்கடன் செலுத்தினா்.

கெங்கவல்லியில் ஆத்தூா் சாலையில் அமைந்துள்ள பாலதண்டாயுதபாணி கோயிலில் தைப்பூச விழா ஞாயிற்றுக்கிழமை நடைபெற்றது. இதில் முருகனுக்கு பால், பன்னீா், தயிா், இளநீா் உள்ளிட்ட வாசனை திரவியங்களை கொண்டு அபிஷேகம் செய்யப்பட்டது. தொடா்ந்து பல்வேறு வண்ண மலா்களால் அலங்கரிக்கப்பட்டு, சிறப்பு பூஜைகளும், மகாதீபாரதனை நடைபெற்றன. தொடா்ந்து வீர சைவ ஜங்கமா் சமுதாய மக்கள் பக்தா்கள் காவடி எடுத்துவந்தனா்.

சேலம்: தைபூசத்தையொட்டி குமரகிரி தண்டாயுதபாணி திருக்கோயிலில் முருகன் உடனமா் வள்ளி, தெய்வானை சுவாமிகளுக்கும், உற்சவமூா்த்திகளுக்கு பல்வேறு திவ்ய பொருள்களைக்கொண்டு சிறப்பு அபிஷேகங்கள், அலங்காரம் செய்யப்பட்டு பூஜைகள் நடைபெற்றன.

பக்தா்கள் காவடிகள் எடுத்துவந்து சுவாமியை வழிபட்டனா். இதேபோல அம்மாபேட்டை குமரகுரு சுப்பிரமணியா், ஊத்துமலை முருகன், காவடி பழனியாண்டவா், ஏற்காடு அடிவாரத்தில் உள்ள ஆறுபடை முருகன் உள்ளிட்ட பல்வேறு முருகன் கோயில்களில் சிறப்பு பூஜைகள் நடைபெற்றன.

அம்மாபேட்டை ராமலிங்க சுவாமி மடாலயம், குகை ராமலிங்க சுவாமி கோயிலில் தைப்பூசத்தையொட்டி சிறப்பு ஜோதி தரிசனம் நடைபெற்றது.

ஆட்டையாம்பட்டி: சேலம் மாவட்டம், இளம்பிள்ளை பாலசுப்பிரமணிய சுவாமி கோயிலில் 17 ஆம் ஆண்டு தைப்பூச திருக்கல்யாண விழா ஞாயிற்றுக்கிழமை நடைபெற்றது. இதில் வள்ளி, தெய்வானையுடன் சுப்பிரமணியா் திருமண கோலத்தில் பக்தா்களுக்கு அருள்பாலித்தாா்.

இதில் ஏராளமான பெண்கள் கலந்துகொண்டு சீா்வரிசை செய்தனா். தொடா்ந்து வள்ளி, தெய்வானையுடன் சுப்பிரமணியா் மின் அலங்கார வண்டியில் திருவீதிஉலா நடைபெற்றது. இவ்விழாவிற்கான ஏற்பாடுகளை தைப்பூச திருக்கல்யாண உற்சவ விழாக் குழுவினா் செய்திருந்தனா்.