செய்தி மடல்
இ-பேப்பர்
சேலம் வழியாக சென்ற ரயில்களில் கடத்திய 3 கிலோ கஞ்சா, 44 கிலோ குட்கா பறிமுதல்
கஞ்சா, குட்கா பறிமுதல் - கோப்புப் படம்
சேலம் வழியாக சென்ற ரயில்களில் கடத்தப்பட்ட 3 கிலோ கஞ்சா, 44 கிலோ குட்காவை ரயில்வே போலீஸாா் ஞாயிற்றுக்கிழமை பறிமுதல் செய்துள்ளனா்.
வடமாநிலங்களில் இருந்து தமிழகத்துக்கும், கேரளத்திற்கும் ரயில்களில் கஞ்சா, குட்கா போன்ற போதைப் பொருள்கள் கடத்தப்பட்டு வருகிறது. இதைத் தடுக்க ரயில்வே போலீஸில் தனிப்படை அமைக்கப்பட்டு சோதனை நடத்தப்பட்டு வருகிறது.
இந்நிலையில் சேலம் உட்கோட்ட தனிப்படை போலீஸாா் பாட்னா - எா்ணாகுளம் விரைவு ரயிலில் ஞாயிற்றுக்கிழமை சோதனை நடத்தினா். இதில் முன்பக்க பொதுப்பெட்டியில் கழிப்பறை அருகே கேட்பாரற்று கிடந்த பேக்கை எடுத்து சோதனையிட்டனா். அதில், 2 கிலோ கஞ்சா இருந்தது தெரியவந்தது. அவற்றை போலீஸாா் பறிமுதல் செய்தனா்.
இதேபோல, புதுதில்லி - திருவனந்தபுரம் கேரள விரைவு ரயிலில் தனிப்படை போலீஸாா் நடத்திய சோதனையில், பொதுக் கழிப்பறை அருகே பெரிய பேக்கில் குட்கா, பான் மசாலா உள்ளிட்ட 35 கிலோ போதை புகையிலை பொருள்கள், ஒரு கிலோ கஞ்சா இருந்தது.
இதே போன்று, திப்ரூகா் - கன்னியாகுமரி விரைவு ரயிலில் பின்பக்க பொதுப் பெட்டியில் கேட்பாரற்று கிடந்த 9 கிலோ குட்காவை பறிமுதல் செய்தனா். பறிமுதல் செய்யப்பட்ட 44 கிலோ குட்கா, 3 கிலோ கஞ்சா ஆகியவற்றை சேலம் ரயில்வே போலீஸில் தனிப்படையினா் ஒப்படைத்தனா்.
பின்னூட்டத்தில் வெளியாகும் கருத்துகளுக்கு அவற்றைப் பதிவிடுவோரே முழுப் பொறுப்பு; அவை தினமணியின் கருத்துகளைப் பிரதிபலிக்கவில்லை.தனிநபர், சமூகம், மதம் அல்லது நாடு ஆகியவற்றுக்கு எதிராக அவமதிக்கிற அல்லது ஆபாசமான விதத்திலுள்ள எந்தவொரு கருத்தும் இந்திய அரசின் தகவல் தொழில்நுட்பக் கொள்கைப்படி தண்டனைக்குரிய குற்றம். இதுபோன்ற கருத்துகளுக்கு எதிராக உரிய சட்ட நடவடிக்கை எடுக்கப்படும்.