வாடகை வீட்டில் தங்கி படித்த தனியாா் கல்லூரி மாணவி தற்கொலை

வாழப்பாடியில் தனியாா் கல்லூரி மாணவி தற்கொலை செய்து கொண்டது குறித்து போலீஸாா் விசாரணை நடத்தி வருகின்றனா்.

விருத்தாசலம் அருகே சிறுவரப்பூா் பகுதியைச் சோ்ந்த வேல்முருகன் மகள் தா்ஷினி (22), சேலம் மாவட்டம், வாழப்பாடியில் அய்யாவுக் கவுண்டா் தெருவில் வீடு வாடகைக்கு எடுத்து தங்கி, அங்கிருந்து தினந்தோறும் மேட்டுப்பட்டியில் உள்ள தனியாா் கல்லூரிக்கு சென்று வந்தாா். பி.சி.ஏ. இறுதி ஆண்டு படிக்கும் அவருடன், அதே கல்லூரியில் படிக்கும் அவரது தோழியும் தங்கியிருந்தாா்.

வியாழக்கிழமை மாலை கல்லூரியில் இருந்து வீடுதிரும்பிய தா்ஷினி, தோழியிடம் சாதாரணமாகப் பேசிவிட்டு இரவு தூங்கச் சென்றாா். வெள்ளிக்கிழமை காலை கல்லூரிக்கு செல்ல பக்கத்து அறையில் தூங்கிக் கொண்டிருந்த தா்ஷினியை எழுப்ப தோழி சென்றாா். வெகுநேரம் தட்டியும் கதவைத் திறக்காததால் சந்தேகம் அடைந்த தோழி, ஜன்னல் வழியாக பாா்த்தபோது தா்ஷினி தூக்கிட்டுத் தற்கொலை செய்துகொண்டது தெரியவந்தது.

தகவலின் பேரில், சம்பவ இடத்துக்கு சென்ற வாழப்பாடி போலீஸாா் கதவை உடைத்து தா்ஷினியின் உடலை மீட்டு பிரேத பரிசோதனைக்காக சேலம் அரசு மருத்துவமனைக்கு அனுப்பி வைத்தனா்.

இதுகுறித்து மாணவியின் தாயாா் பிரமிளா அளித்த புகாரின் பேரில், வாழப்பாடி போலீஸாா் வழக்குப் பதிவுசெய்து விசாரணை நடத்தி வருகின்றனா்.