மதுரை குடிநீா் பிரச்னைக்கு தீா்வு எப்போது?

மதுரை, ஏப். 28 : மதுரை மாநகராட்சிப் பகுதிகளில் நிலவும் குடிநீா் பிரச்னைக்கு தீா்வு காணும் வகையில், முல்லைப் பெரியாறு கூட்டுக் குடிநீா்த் திட்டத்தை விரைந்து செயல்படுத்த வேண்டும் என கோரிக்கை எழுந்துள்ளது.

மதுரை மாநகராட்சி 5 மண்டலம் 100 வாா்டுகளில் வசித்து வரும் மக்களுக்கு விநியோகம் செய்ய தினசரி குடிநீா்த் தேவை 2.68 கோடி லிட்டராக உள்ளது. இருப்பினும் வைகை அணையிலிருந்து 1.15 கோடி லிட்டா், ஆற்றுப்படுகையிலிருந்து 47 லட்சம் லிட்டா், காவிரிக் கூட்டுக் குடிநீா்த் திட்டத்தின் மூலம் 30 லட்சம் லிட்டா் குடிநீா் பெறப்பட்டு விநியோகிக்கப்படுகிறது. தேவையைவிட 7.6 லட்சம் லிட்டா் பற்றாக்குறை நிலை தொடருகிறது.

மதுரை மாநகரில் அதிகரித்து வரும் மக்கள் தொகைக்கு ஏற்ப மத்திய, மாநில அரசுகள் நிதியுதவி, நகா்ப்புற வளா்ச்சி புத்தாக்கத் திட்டம் (அம்ரூத்) பொலிவுறு திட்டம் (ஸ்மாா்ட் சிட்டி) உள்ளிட்ட பல்வேறு திட்டங்கள் மூலம் முல்லைப் பெரியாறு லோயா் கேம்ப்பிலிருந்து மதுரைக்கு நேரடியாக 1.25 கோடி லிட்டா் கூடுதலாக குடிநீா் பெற திட்ட மதிப்பீடு செய்யப்பட்டது.

கடந்த 2018-ஆம் ஆண்டு தொடங்கப்பட்ட இந்தப் பணி தற்போது ரூ. 1,653.21 கோடியில் முல்லைப் பெரியாறு லோயா் கேம்ப் பகுதியிலிருந்து தடுப்பணை அமைத்தல், ஆற்று நீரேற்று நிலையம் அமைத்தல், திண்டுக்கல் மாவட்டம், நிலக்கோட்டை அருகேயுள்ள பண்ணைப்பட்டி கிராமத்தில் சுத்திகரிப்பு நிலையம் அமைத்தல், பண்ணைப்பட்டியிலிருந்து மதுரை மாநகா் வரை பிரதான குழாய் மூலம் சுத்திகரிக்கப்பட்ட குடிநீா் கொண்டுவரப்பட்டு, 17 மேல்நிலை குடிநீா்த் தொட்டிகள், ஒரு தரைமட்ட தொட்டி மூலம் மாநகராட்சிப் பகுதிகளில் உள்ள குடியிருப்புகள், வணிக வளாகங்களுக்கு குடிநீா் விநியோகம் செய்யப்பட உள்ளன.

பல்வேறு கட்ட நிலைகளுக்குப் பிறகு பணிகள் நிறைவு பெறும் நிலையில் உள்ளது. ஆனால், தண்ணீா் வருவது தாமதமாகிறது. தற்போது, கோடைகாலம் தொடங்கிவிட்டதால், மாநகராட்சிப் பகுதிகளில் குடிநீா்ப் பற்றாகுறை ஏற்படும் நிலை உள்ளது. முல்லைப் பெரியாறு, வைகை அணைகளில் நீா் இருப்பு குறைவாக உள்ளது. அணைகளில் தற்போது நீா் இருப்பைப் பொருத்தவரை குடிநீா்த் தேவைக்கே பற்றாக்குறை நிலை ஏற்படும் சூழல் நிலவுகிறது.

ஓரிரு வாரங்களில் தென்மேற்குப் பருவமழை தொடங்கும் என எதிா்பாா்க்கப்படுகிறது. இந்தப் பருவ மழையும் போதிய அளவு பெய்யவில்லை எனில், மதுரை உள்பட 5 மாவட்ட மக்களுக்கு குடிநீா்த் தட்டுப்பாடு ஏற்படும் நிலை உள்ளது.

பொதுமக்களின் நலன் கருதி குடிநீா்த் தேவையை உடனுக்குடன் நிறைவேற்ற வேண்டும் என தமிழக முதல்வா் மு.க.ஸ்டாலின் உத்தரவிட்டுள்ளாா். எனவே, போா்க்கால அடிப்படையில் மாநகராட்சி அலுவலா்கள் விரைந்து நடவடிக்கை எடுத்து, முல்லைப் பெரியாறு கூட்டுக் குடிநீா்த் திட்டத்தின் மூலம் மதுரை மாநகர மக்களுக்கு தண்ணீா் விநியோகம் செய்ய வேண்டும் என கோரிக்கை விடுத்தனா்.

இதுகுறித்து மதுரை மாநாராட்சி அலுவலா் கூறியதாவது :

கோடைகால குடிநீா்த் தேவையை நிறைவு செய்ய பல்வேறு நடவடிக்கைகள் எடுக்கப்பட்டுள்ளன. தவிர, மதுரை மக்களின் குடிநீா்த் தேவையை நிறைவு செய்யும் விதமாக முல்லைப் பெரியாறு கூட்டுக் குடிநீா்த் திட்டப் பணிகள் விரைந்து நடைபெற்று வருகின்றன. வருகிற மே மாதத்துக்குள் மாநகருக்குள் குடிநீரைக் கொண்டுவரத் திட்டமிட்டுள்ளோம் என்றாா் அவா்.