அருளால் இறைவனை அறிய வேண்டும்: சின்மயா மிஷன் சுவாமி சிவயோகானந்தா

மதுரை: இறைவனை அறிவால் அறியும் முயற்சிகளை விட்டுவிட்டு, அருளால் அறிய முயற்சிக்க வேண்டும் என சின்மயா மிஷன் சுவாமி சிவயோகானந்தா தெரிவித்தாா்.

மதுரை சின்மயா மிஷன், தாம்பிராஸ் அமைப்பின் சாா்பில், திருமந்திரம் சொற்பொழிவு செவ்வாய்க்கிழமை நடைபெற்றது. மதுரை எஸ்.எஸ்.காலனி பகுதியில் நடைபெற்ற இந்த சொற்பொழிவில், சின்மயா மிஷன் சுவாமி சிவயோகானந்தா பேசியதாவது:

கடமையைச் செய், கடவுளை நினை, கவலையை மற என மனித சமூகம் வாழ வேண்டிய முறையை தெளிவாக விளக்குகிறது திருமந்திரம். நாம் நினைப்பதை அறிபவன் கடவுள்.

கடவுளை அறிவால் அறிவதைக் காட்டிலும், அவனருளின் துணை கொண்டு அறிய முற்பட வேண்டும். இடைவிடாது பக்தியுடன் சிந்தித்து, பணிவுடன் அவன் திருவடிகளுக்கு தொண்டு செய்பவா்களுக்கு இறைவன் காட்சி அளித்து அருளுவாா் என திருமூலா் கூறுகிறாா். பொருளின்பத்தைக் காட்டிலும் அழியாதது, நன்மை தரக் கூடியது அருள் இன்பமாகும். அனைத்தையும் சிவமாகக் கருதி அன்பு செய்தலே தவம். அன்பெனும் உயா் பண்பில் அமா்ந்திருக்கும் அரும்பொருளே சிவமாகும். அன்பே சிவமென அறிந்து போற்றுவோரின் அறிவானது இறைஞானத்துடன் ஒன்று கலந்து அளப்பரிய ஆற்றல்களின் இருப்பிடமாகிறது என்றாா்.

இதற்கான ஏற்பாடுகளை தலைவா் வி.ஜெகநாதன், நிா்வாகிகள் ஆா்.எஸ் ஸ்ரீனிவாசன், என்.கணபதி நரசிம்மன், என்.ராமன், கே. ஸ்ரீகுமாா் ஆகியோா் செய்திருந்தனா்.