கொடைக்கானலில் தொடர் மழையால் மரம் விழுந்தது

கொடைக்கானலில் வெள்ளிக்கிழமை இரவு பெய்த தொடர் மழையால், மரங்கள் விழுந்து போக்குவரத்துக்கு பாதிப்பு ஏற்பட்டது.

கொடைக்கானலில் கடந்த 3 நாள்களாக பரவலாக மழை பெய்து வந்தது. இந் நிலையில், வெள்ளிக்கிழமை இரவு பெய்த மழையில், கொடைக்கானல்-வத்தலகுண்டு மலைச் சாலையான டைகர் சோலை, ஊத்து ஆகிய இடங்களில் மரங்கள் சாய்ந்து விழுந்தன. இதனால், அப்பகுதிகளில் ஒரு மணி நேரத்துக்கும் மேலாக போக்குவரத்து பாதிக்கப்பட்டது.   உடனே, சம்பவ இடங்களுக்கு வனத் துறையினர் மற்றும் நெடுஞ்சாலைத் துறையினர் சென்று, மரங்களை அகற்றி போக்குவரத்தை சீர்படுத்தினர்.