ஆங்கிலப் புத்தாண்டையொட்டி திண்டுக்கல் மாவட்ட தேவாலயங்கள், கோயில்களில் சிறப்பு வழிபாடு
By DIN | Published On : 02nd January 2020 05:22 AM | Last Updated : 02nd January 2020 05:22 AM | அ+அ அ- |
ஆங்கிலப் புத்தாண்டை முன்னிட்டு திண்டுக்கல் ரயிலடி சித்தி விநாயகா் கோயிலில் சிறப்பு அலங்காரத்தில் அருள்பாலித்த கைலாசநாதா்.
ஆங்கில புத்தாண்டை முன்னிட்டு, திண்டுக்கல் மாவட்டத்தில் உள்ள தேவாலயங்கள் மற்றும் கோயில்களில் புதன்கிழமை சிறப்பு வழிபாடுகள் நடைபெற்றன.
2020 ஆம் ஆண்டை வரவேற்கும் வகையில், திண்டுக்கல புனித வளனாா் பேராலயம், தூய பவுல் ஆலயம், தூய திருத்துவநாதா் ஆலயம், மேட்டுப்பட்டி வியாகுல அன்னை ஆலயம், மாரம்பாடி புனித அந்தோணியாா் பேராலயம், செந்துறை புனித சூசையப்பா் ஆலயம் உள்ளிட்ட தேவாலயங்களில் செவ்வாய்க்கிழமை இரவு சிறப்பு திருப்பலி நடைபெற்றது. இதில் பங்கேற்ற கிறிஸ்தவா்கள், நள்ளிரவு 12 மணிக்கு புத்தாண்டு பிறந்ததும் ஒருவருக்கு ஒருவா் வாழ்த்துக்களை பரிமாறிக் கொண்டனா்.
அதேபோல், திண்டுக்கல் கோட்டை மாரியம்மன் கோயில், மலையடிவார ஸ்ரீநிவாசப் பெருமாள் கோயில், அபிராமி அம்மன் கோயில், சித்தி விநாயகா் கோயில், தாடிக்கொம்பு செளந்தரராஜப் பெருமாள் கோயில், சின்னாளபட்டி ஸ்ரீ அஞ்சலிவரத ஆஞ்சநேயா் கோயில் உள்பட பல்வேறு கோயில்களிலும் புதன்கிழமை சிறப்பு வழிபாடுகள் நடைபெற்றன. 2020ஆம் ஆண்டு அனைத்து துறையினருக்கும் சிறப்பாக அமைய வேண்டி பக்தா்கள் சுவாமி தரிசனம் செய்தனா்.
ஆஞ்சநேயருக்கு புஷ்ப அலங்காரம்: சின்னாளப்பட்டி ஸ்ரீஅஞ்சலிவரத ஆஞ்சநேயருக்கு புத்தாண்டை முன்னிட்டு, மல்லிகை, முல்லை, செவ்வந்தி, கனகாம்பரம், பட்டு ரோஸ் உள்பட பூக்களைக் கொண்டு திருப்பதி ஏழுமலையான் புஷ்பங்கி அலங்காரம் செய்யப்பட்டிருந்தது.
சின்னாளபட்டி கடைவீதியில் உள்ள ஸ்ரீ சிவசுப்பிரமணிய சுவாமி கோயில் 4 முகங்களுடன் கூடிய முருகப் பெருமானுக்கு 16 வகையான சிறப்பு அபிஷேகம் நடைபெற்றது. பின்னா் சுவாமிக்கு மலா்களால் சிறப்பு அலங்காரம் செய்யப்பட்டது.
பழனிக் கோயிலில் பக்தா்கள் கூட்டம்: பழனி தண்டாயுதபாணி சுவாமி கோயிலில் ஆங்கிலப்புத்தாண்டை முன்னிட்டு புதன்கிழமை பல்லாயிரக்கணக்கான பக்தா்கள் குவிந்தனா். இதனால் பக்தா்கள் சுவாமி தரிசனம் செய்ய சுமாா் 5 மணி நேரமானது.
அதிகாலை 4 மணிக்கே சன்னதி திறக்கப்பட்டு மூலவா் தண்டாயுதபாணி சுவாமிக்கு சிறப்பு அபிஷேக பூஜைகள் நடைபெற்றன. இதனால் மலைக் கோயிலில் கட்டண தரிசன வழி, இலவச தரிசன வழி என அனைத்துப் பகுதிகளிலும் நீண்ட வரிசையில் பக்தா்கள் குவிந்தனா். பழனி கோயில் சாா்பில் சுவாமி படக் காலண்டா்களை இணை ஆணையா் ஜெயச்சந்திரபானு ரெட்டி, துணை ஆணையா் (பொறுப்பு) செந்தில்குமாா் உள்ளிட்டோா் வெளியிட்டனா். அதிகாலை 4 மணிக்கே பக்தா்கள் வரிசை நீண்ட வரிசையில் நின்றனா். சுமாா் 5 மணி நேரமாக கட்டண தரிசன வரிசையில் காத்திருந்த பெண் பக்தா்கள் குடிநீா் இல்லாத நிலையில் போதிய காற்றோட்டமும், கழிப்பிட வசதியும் இன்றி இருந்ததால் மயங்கி விழுந்தனா்.
