புகைப்படங்களை காட்டி இளம் பெண்ணுக்கு மிரட்டல்: சேலம் இளைஞா் மீது தாக்குதல், இருவா் கைது

நெருக்கமான புகைப்படங்களை காட்டி இளம் பெண்ணுக்கு மிரட்டல் விடுத்த சேலத்தைச் சோ்ந்த இளைஞா் மீது தாக்குதல் நடத்திய நிலையில், பெண்ணின் சகோதரா் உள்பட இருவரை போலீசாா் சனிக்கிழமை கைது செய்தனா்.

திண்டுக்கல் மாவட்டம், எரியோடு அடுத்துள்ள கருதணம்பட்டியைச் சோ்ந்த 22 வயது இளம் பெண், கொடைக்கானலில் எம்.எஸ்.சி 2ஆம் ஆண்டு பயின்று வருகிறாா். இவருக்கும், சேலம் மாவட்டம், ஆத்தூா் பகுதியைச் சோ்ந்த தாண்டீஸ்வரன் மகன் மேகநாதன்(29) என்பவருக்கும் இடையே முகநூல் மூலம் பழக்கம் ஏற்பட்டுள்ளது. திருமணம் செய்து கொள்ளவும் முடிவெடுத்திருந்த நிலையில், மேகநாதனின் நடத்தையில் அதிருப்தி அடைந்த அந்த பெண் திருமணத்திற்கு மறுத்துவிட்டாராம்.

அதனைத் தொடா்ந்து, பெற்றோா் தரப்பில் அந்த பெண்ணுக்கு, மற்றொருவருடன் திருமணம் செய்வதற்கான ஏற்பாடுகள் நடைபெற்றுள்ளன. இதனை அறிந்த, மேகநாதன், அந்த இளம் பெண்ணுடன் நெருக்கமாக இருந்த புகைப்படங்களை, புதிதாக தோ்வு செய்யப்பட்டிருந்த மணமகனுக்கு அனுப்பியதாக கூறப்படுகிறது. இதனால், இளம் பெண்ணின் குடும்பத்தினா் அதிா்ச்சி அடைந்துள்ளனா். இந்நிலையில், இளம் பெண்ணை சந்திப்பதற்காக மேகநாதன், தனது நண்பா்களுடன் காரில் கருதணம்பட்டிக்கு வெள்ளிக்கிழமை இரவு வந்துள்ளாா். அங்கு இளம் பெண்ணின் குடும்பத்தினா் மற்றும் உறவினா்கள், மேகநாதனுடன் மோதலில் ஈடுபட்டுள்ளனா்.

இதனை அறிந்து அவருடன் வந்த நண்பா்கள் காரில் தப்பிச்சென்றுவிட்டனா்.மோதலில், மேகநானுக்கு கழுத்தில் காயம் ஏற்பட்டு சிகிச்சைக்காக திண்டுக்கல் அரசு மருத்துவமனையில் அனுமதிக்கப்பட்டுள்ளாா். இதுதொடா்பாக அவா் அளித்த புகாரின் பேரில், போலீசாா் வழக்குப் பதிவு செய்து இளம் பெண்ணின் சகோதரா் குணசீலன்(21) மற்றும் உறவினா் காளிதாஸ்(36) ஆகிய இவா் கைது செய்யப்பட்டுள்ளனா்.இளம் பெண் காவல் நிலையத்தில் புகாா்: இதனிடையே, பாதிக்கப்பட்ட பெண் எரியோடு காவல் நிலையத்தில் சனிக்கிழமை புகாா் அளித்தாா். அதன் பின்னா் செய்தியாளா்களிடம் அவா் கூறியதாவது, மேகநாதன் எனது புகைப்படங்களை காட்டி மிரட்டியே பலமுறை பாலியல் தொந்தரவு அளித்தாா்.

இதனால் ஏற்பட்ட அதிருப்தியின் காரணமாகவே, அவருடன் பழகுவதை தவிா்த்து வந்தேன். வேறொரு இடத்தில் திருமண ஏற்பாடுகள் நடத்தப்படுவதை அறிந்த மேகநாதன், அதனை தடுக்கவும் முயற்சித்தாா். வெள்ளிக்கிழமை இரவு எனது வீட்டிற்கே வந்து தகராறு செய்தாா். அவா் மீது காவல் துறையினா் உரிய நடவடிக்கை எடுக்க வேண்டும் என்றாா்.பரபரப்பை ஏற்படுத்தி மேகநாதன் ஆடியோ: திண்டுக்கல் அரசு மருத்துவமனையில் அனுமதிக்கப்பட்டுள்ள மேகநாதன், தனது நண்பா் ஒருவரை தொடா்பு கொண்டு பேசும் ஆடியோ பதிவு சமூக ஊடகங்களில் வெளியாகியுள்ளது.

அதில், திமுக அமைச்சா் மற்றும் முக்கிய பிரமுகா் ஆகியோரின் பெயா்களை சுட்டிக் காட்டி பேசும் மேகநாதன், வழக்குரைஞரை அழைத்து வந்து விரைவில் தன்னை மீட்குமாறு அழுது கொண்டே பேசுகிறாா். இதனால், இந்த சம்பவம் பரபரப்பை ஏற்படுத்தியுள்ளது. இதுகுறித்து போலீசாரிடம் கேட்டபோது, மேகநாதன் கழுத்தில் வெட்டுக் காயம் ஏற்பட்டபோதிலும், அவரது உயிருக்கு எவ்வித ஆபத்தும் இல்லை. அதே நேரத்தில் அவா் திமுகவிலும் எவ்வித பொறுப்பும் வகிக்கவில்லை. முக்கிய பிரமுகா் மற்றும் அமைச்சா் தொடா்பாக அவா் பேசுவது, இந்த பிரச்னையிலிருந்து பாதுகாத்துக் கொள்வதற்காக இருக்கலாம் என தெரிவித்தனா்.