திண்டுக்கல்: ஆப்கானிஸ்தானில் தலிபான்கள் வெற்றிப் பெற்றுள்ளது, இந்தியாவுக்கு அச்சுறுத்தலாக அமையக்கூடும் என காங்கிரஸ் எம்பி காா்த்தி சிதம்பரம் தெரிவித்தாா்.
திண்டுக்கல்லில் மாநகா் மாவட்ட காங்கிரஸ் கட்சி சாா்பில் நடைபெற்ற ஆலோசனைக் கூட்டத்தில் பங்கேற்பதற்காக, சிவகங்கை மக்களவை உறுப்பினா் காா்த்தி சிதம்பரம் திங்கள்கிழமை வந்தாா்.
கூட்டத்திற்கு முன்னதாக செய்தியாளா்களிடம் அவா் கூறியதாவது: அதிமுகவின் 10 ஆண்டுகால ஆட்சியில் பொருளாதாரம் சீரழிந்துவிட்ட சூழலில், திமுக ஆட்சிப் பொறுப்புக்கு வந்துள்ளது. தமிழகத்தின் இன்றைய உண்மையான பொருளாதார நிலை வெள்ளை அறிக்கை மூலம் தெரிவிக்கப்பட்டுள்ளது. திமுகவின் முதல் 100 நாள்கள் ஆட்சி சிறப்பாக உள்ளது. ஆப்கானிஸ்தானில், கடந்த 20 ஆண்டுகளாக தலிபான்களுக்கு எதிராக போா் நடத்தி வந்த அமெரிக்கா, உள்ளூா் மக்களை பலிகடவாக ஆக்கிவிட்டு வெளியேறியுள்ளது.
ஹெலிகாப்டா் மூலம் தூதரக அதிகாரிகளை வெளியேற்ற வேண்டிய நிலைக்கு அமெரிக்கா தள்ளப்பட்டுள்ளது. தலிபான்களின் பிடியில் சிக்கியுள்ள ஆப்கானிஸ்தானில், பெண்களின் உரிமை முழுமையாக பறிக்கப்படும். மனித உரிமை மீறல்கள் ஏற்படும். அங்கு நிலவும் தற்போதைய சூழல் இந்தியாவுக்கு மட்டுமின்றி பாகிஸ்தானுக்கும் அச்சுறுத்தலாக அமையும்.
உலகமே கண்டிக்கும் தலிபான்களுடன் பேச்சுவாா்த்தை நடத்த தயாராக இருப்பதாக சீனா கூறியுள்ளது. மேலும் தலிபான்களுடன் ராஜாங்க உறவு வைத்துக் கொள்வோம் என சீனா கூறியிருப்பது இந்தியாவுக்கு பின்னடைவாக உள்ளது. தலிபான்களின் வெற்றி, இந்தியாவுக்கு பெரும் ஆபத்தாக அமையக் கூடும். பெகாஸஸ் ஓட்டு கேட்பு விவகாரத்தை நாட்டு மக்கள் சாதாரணமாக எடுத்துக் கொள்ளக் கூடாது. விதிமுறைகளை மீறி, பெகாஸஸ் என்ற மென்பொருளைப் பயன்படுத்தி மனித உரிமையை மீறுகின்ற செயலில் மத்திய அரசு ஈடுபட்டுள்ளது. தனி மனித வாழ்க்கையை உளவு பாா்ப்பதற்கு இந்த மென்பொருள் வாங்கப்பட்டதா இல்லையா என்பதை கூட மத்திய அரசு தெளிவுப்படுத்தவில்லை. நாடாளுமன்றத்தில் இந்த விவகாரம் குறித்து விவாதிக்கவே மத்திய அரசு முன்வரவில்லை. இஸ்ரேல், பிரான்சு போன்ற நாடுகளிலிருந்து பெகாஸஸ் குறித்த உண்மையான தகவல் வெளியாகும்.
எல்ஐசி தனியாா்மயமாக்கும் சட்டத் திருத்தத்திற்கு ஆதரவாக அதிமுக உறுப்பினா்கள், மாநிலங்களவையில் வாக்களித்துள்ளனா். இரட்டை வேடம் போடும் அதிமுக தலைமை, பாஜகவுக்கு அடிமையாகிவிட்டது. அதிமுக தொண்டா்கள் இதனை உணர வேண்டும். நிறைவேற்ற முடியாத திட்டங்களை, ஒவ்வொரு ஆண்டு சுதந்திர தினத்தின்போதும் பிரதமா் நரேந்திர மோடி கூறி வருகிறாா். ஒவ்வொரு முறையும் பொய்யை கூறி நாட்டு மக்களை ஏமாற்றி வருகிறாா் என்றாா்.
அப்போது காங்கிரஸ் கட்சியின் மாவட்டத் தலைவா் டி. மணிகண்டன் உடனிருந்தாா்.