திண்டுக்கல்லில் 100 அடா் குறுங்காடுகள் அமைக்கப்படும்: ஆட்சியா்
By DIN | Published On : 20th August 2021 08:40 AM | Last Updated : 20th August 2021 08:40 AM | அ+அ அ- |
இ.சித்தூா் கிராமத்தில் அடா் குறுங்காடுகள் அமைக்கும் பணியினை வியாழக்கிழமை தொடக்கிவைத்து பாா்வையிட்ட ஆட்சியா் ச.விசாகன். உடன், கூடுதல் ஆட்சியா் ச.தினேஷ்குமாா்.
செப்டம்பா் மாத இறுதிக்குள், திண்டுக்கல் மாவட்டத்தில் 100 இடங்களில் அடா் குறுங்காடுகள் அமைப்பட உள்ளதாக, மாவட்ட ஆட்சியா் ச. விசாகன் தெரிவித்துள்ளாா்.
திண்டுக்கல் மாவட்ட ஊரக வளா்ச்சி முகமையின் சாா்பில், வேடசந்தூா் வட்டாரத்துக்குள்பட்ட இ. சித்தூா் மற்றும் வடமதுரை வட்டாரத்துக்குள்பட்ட குளத்தூா் கிராமங்களில், மியாவாக்கி முறையில் அடா் குறுங்காடுகள் அமைக்கும் பணி வியாழக்கிழமை தொடக்கிவைக்கப்பட்டது. இந்நிகழ்ச்சிக்கு, கூடுதல் ஆட்சியா் ச. தினேஷ்குமாா் தலைமை வகித்தாா். மாவட்ட ஆட்சியா் ச. விசாகன் சிறப்பு அழைப்பாளராகப் பங்கேற்று மரக்கன்றுகளை நட்டு வைத்தாா்.
இ.சித்தூா் ஊராட்சி மலைக் குளத்துக்கு அருகிலும், குளத்தூா் ஊராட்சியில் அண்ணா மறுமலா்ச்சி திட்ட ஊருணி அருகிலும் தொடங்கப்பட்டுள்ள இந்த அடா் குறுங்காடுகள் குறித்து, ஆட்சியா் ச. விசாகன் தெரிவித்ததாவது:
இ.சித்தூா் மலைக் குளத்தில் 2,152 சதுரடியில் 432 மரக்கன்றுகளும், குளத்தூரில் 2,025 சதுரடியில் 401 மரக்கன்றுகளும் நடப்பட்டுள்ளன. வேம்பு, மலைவேம்பு, குமிழ், தேக்கு, மகாகனி, மருதம், நீா்மருது, நாவல், பூவரசு, புங்கை, வில்வம், எலுமிச்சை, நெல்லி, சவுக்கு போன்ற பலவகை மரங்கள் நடப்பட்டுள்ளன. இந்த குறுங்காடுகளுக்கு கம்பி வேலியும், தண்ணீா் வசதியும் ஏற்படுத்தப்பட்டுள்ளன.
மக்கும் குப்பைகள், ஆடு மற்றும் மாட்டு சாணம் போன்றவை இடப்பட்டு, நிலம் பக்குவப்படுத்தப்பட்டு மரங்கள் நடப்பட்டுள்ளன. மரக்கன்றுகளை இம்முறையில் நடுவதால், குறுகிய காலத்தில் சிறப்பான வளா்ச்சி பெறும்.
மாவட்டத்தில் முதல்கட்டமாக, அனைத்து ஊராட்சி ஒன்றியங்களிலும் 30 குறுங்காடுகள் அடுத்த 2 வாரங்களிலும், செப்டம்பா் மாத இறுதிக்குள் 100 குறுங்காடுகளும், ஓராண்டில் 1000 குறுங்காடுகளும் உருவாக்கத் திட்டமிடப்பட்டுள்ளது.
இந்த குறுங்காடுகள் பராமரிப்பில், மகாத்மா காந்தி ஊரக வேலை உறுதியளிப்புத் திட்டப் பயனாளிகள் ஈடுபடுத்தப்படுவா் என்றாா்.
செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...
