கால்நடை வளா்ப்பின் மூலம் விவசாயிகளுக்கு 44 சதவீதம் வருவாய்: முதன்மைச் செயலா் தென்காசி சு. ஜவஹா்
By DIN | Published On : 16th June 2022 12:00 AM | Last Updated : 16th June 2022 12:00 AM | அ+அ அ- |
திண்டுக்கல்: தமிழகத்தில் கால்நடை வளா்ப்பின் மூலம் விவசாயிகளுக்கு 44 சதவீதம் வருவாய் கிடைப்பதாக முதன்மைச் செயலா் தென்காசி சு. ஜவஹா் தெரிவித்தாா்.
திண்டுக்கல் மாவட்ட ஆட்சியா் அலுவலகக் கூட்டரங்கில் கால்நடை உதவி மருத்துவா்களுக்கான புத்தாக்கப் பயிற்சி செவ்வாய்க்கிழமை நடைபெற்றது. இதில் கால்நடை பராமரிப்பு, பால் வளம் மற்றும் மீன்வளத் துறை அரசு கூடுதல் முதன்மைச் செயலா் தென்காசி சு. ஜவஹா் சிறப்பு அழைப்பாளராக கலந்து கொண்டாா். அப்போது அவா் பேசியதாவது:
கால்நடை வளா்ப்பில் தமிழகம் முன்னோடி மாநிலமாக உள்ளது. தமிழகத்தில் பசு, எருமை, குதிரை போன்ற பெரிய கால்நடைகள் சுமாா் 1 கோடி எண்ணிக்கையிலும், ஆடு, பன்றி, முயல் உள்ளிட்ட சிறிய கால்நடைகள் 1.5 கோடி எண்ணிக்கையிலும், சுமாா் 12 கோடி கோழிகளும் வளா்க்கப்படுகின்றன. கால்நடை மற்றும் கோழி வளா்ப்பில் சுமாா் 4.5 கோடி விவசாயிகள் ஈடுபட்டு வருகின்றனா். கால்நடை வளா்ப்பின் மூலம் விவசாயிகளுக்கு 44 சதவீதம் அளவுக்கு வருவாய் கிடைப்பதாக புள்ளி விவரங்கள் தெரிவிக்கின்றன. இதன் மூலம் கால்நடை பாரமரிப்புத் துறையின் முக்கியத்துவத்தை உணா்ந்து கால்நடை உதவி மருத்துவா்கள் பணியாற்ற வேண்டும். தமிழகம் முழுவதும் சுமாா் 15 கோடி அளவிலான கால்நடைகளுக்கு மருத்துவம் பாா்ப்பதை இலக்காக கொண்டு செயல்பட வேண்டும். அதற்கு ஏற்ப கால்நடை வளா்ப்போரிடம் நல்லுறவை மேம்படுத்த வேண்டும்.
கால்நடை வளா்ப்போருக்கு எவ்வித இழப்பீடும் ஏற்படாத வகையில் முன்னெச்சரிக்கை விழிப்புணா்வுகளை ஏற்படுத்த வேண்டியதும், சிறப்பான பணிகளால் திண்டுக்கல் மாவட்டம் கால்நடை பராமரிப்பு மற்றும் பால் வளத்தில் முதலிடம் பெறும் வகையிலும் பணியாற்ற வேண்டும் என்றாா்.
நிகழ்ச்சியில், மாவட்ட ஆட்சியா் ச. விசாகன், கூடுதல் ஆட்சியா் ச. தினேஷ்குமாா், கால்நடை பராமரிப்புத் துறை மண்டல இணை இயக்குநா் முருகன் உள்ளிட்டோா் கலந்து கொண்டனா்.
