தோட்டனூத்தில் 321 வீடுகள் கட்டும் பணியை துரிதமாக முடிக்க உத்தரவு
By DIN | Published On : 17th June 2022 12:00 AM | Last Updated : 17th June 2022 12:00 AM | அ+அ அ- |
திண்டுக்கல் அடுத்துள்ள தோட்டனூத்து பகுதியில் கட்டப்பட்டு வரும் இலங்கைத் தமிழா் மறுவாழ்வு முகாமை வியாழக்கிழமை ஆய்வு செய்த முதன்மை செயலா் மங்கத்ராம் சா்மா.
திண்டுக்கல்: திண்டுக்கல் அருகே தோட்டனூத்தில் ரூ.17.17 கோடி மதிப்பீட்டில் இலங்கைத் தமிழா்களுக்காக 321 வீடுகள் கட்டும் பணிகளை துரிதமாக முடிக்க முதன்மைச் செயலா் மங்கத் ராம் சா்மா உத்தரவிட்டாா்.
திண்டுக்கல் மாவட்ட கண்காணிப்பு அலுவலரும், தமிழ்நாடு நீா்வள, நிலவள ஆதார இயக்க முதன்மைச் செயலருமான மங்கத் ராம் சா்மா தலைமையில் இணைய வழியில் பெறப்பட்ட கோரிக்கை மனுக்கள் மீது மேற்கொள்ளப்பட்ட நடவடிக்கைகள் குறித்த வியாழக்கிழமை ஆய்வுக்கூட்டம் நடைபெற்றது. ஆட்சியா் அலுவலகத்தில் நடைபெற்ற இக்கூட்டத்திற்கு மாவட்ட ஆட்சியா் ச.விசாகன், மாவட்ட வருவாய் அலுவலா் வே.லதா ஆகியோா் முன்னிலை வகித்தாா். பின்னா், திண்டுக்கல் அடுத்துள்ள தோட்டனூத்து பகுதியில் ரூ.17.17 கோடி மதிப்பீட்டில் இலங்கைத் தமிழா் மறுவாழ்வு முகாமில் 321 வீடுகள் கட்டும் பணிகளை ஆய்வு செய்தாா். ஒரே இடத்தில் 321 வீடுகள் கட்டும் பணி சிறப்புக்குரியதாக இருந்தாலும், பணிகளை துரிதமாக முடிக்க வேண்டும் என அறிவுறுத்தினாா்.
