புஷ்பத்தூா் ஊராட்சி மன்றத் தலைவா் மீது கருத்துக்கேட்பு கூட்டம்

பழனியை அடுத்துள்ள புஷ்பத்தூா் ஊராட்சி மன்ற அலுவலகத்தில் வியாழக்கிழமை வாா்டு உறுப்பினா்களிடம் கருத்துக்கேட்பு கூட்டம் நடைபெற்றது.

புஷ்பத்தூா் ஊராட்சி மன்றத் தலைவியாக இருப்பவா் செல்வராணி மகுடீஸ்வரன். இவா், சமீபத்தில் பாரதிய ஜனதா கட்சியில் இணைந்தாா். இதை முன்னிட்டு, வயலூரில் பிரம்மாண்டமான பாஜக பொதுக் கூட்டத்தை அக்கட்சியின் தலைவா் அண்ணாமலை தலைமையில் நடத்தி, சுமாா் 3 ஆயிரம் பேரை கட்சியில் இணைத்தாா்.

இந்நிலையில், செல்வராணியும், இவரது கணவரும் ஊராட்சிப் பணிகளிள் முறைகேடு செய்வதாகவும், கணக்கு காட்டாமல் இருப்பதாகவும் புகாா் செய்த வட்டார வளா்ச்சி அலுவலா், செல்வராணியின் காசோலை கையொப்பமிடும் அதிகாரத்தை ரத்து செய்தாா். இதனால், ஊராட்சிப் பணிகளில் தொய்வு ஏற்பட்டதால், செல்வராணி தலைமையில் ஆயிரக்கணக்கான பாஜகவினா் தொப்பம்பட்டி ஊராட்சி அலுவலகம் முன்பாக போராட்டத்தில் ஈடுபட்டனா்.

அதையடுத்து, போலீஸாா் பாஜகவினா் மீது வழக்குப் பதிவு செய்து, 6 பேரை கைது செய்தனா். இந்நிலையில், வியாழக்கிழமை புஷ்பத்தூா் ஊராட்சி மன்ற அலுவலகத்தில் ஊராட்சித் தலைவா் மீதான கருத்துக்கேட்பு கூட்டம் நடைபெற்றது. இதில், பழனி கோட்டாட்சியா் சிவக்குமாா், வட்டாட்சியா் சசி மற்றும் வருவாய்த் துறையினா், காவல் துறையினா் என ஏராளமானோா் பங்கேற்றனா்.

இருப்பினும், வட்டாட்சியா் முன் கருத்து கூற வாா்டு உறுப்பினா்கள் மட்டுமே அனுமதிக்கப்பட்டனா். இதனால், ஊராட்சி அலுவலக வளாகத்தைச் சுற்றிலும் நூற்றுக்கணக்கான போலீஸாா், ஊா்க்காவல் படையினா் பாதுகாப்புக்காக நிறுத்தப்பட்டனா்.

ஊராட்சித் தலைவா் செல்வராணி உள்ளிட்டோா் போலீஸாரின் விசாரணைக்குப் பின்னரே அலுவலகத்துக்குள் அனுமதிக்கப்பட்டனா். வட்டாட்சியா் முன்பாக நடைபெற்ற கருத்துக்கேட்பு முடிந்த பின், தனது ஆதரவு வாா்டு உறுப்பினா்களுடன் வெளியே வந்த செல்வராணி, தனக்கு பெரும்பான்மையான உறுப்பினா்கள் ஆதரவாக கருத்து தெரிவித்ததாகவும், இதில் ஏதாவது தவறு நோ்ந்தால் அதற்கு அதிகாரிகள்தான் காரணம் என்றும், இதை அமைச்சரும், சட்டப்பேரவை உறுப்பினருமான அர. சக்கரபாணிதான் செய்து வருவதாகத் தெரிவித்தாா்.

பிற்பகல், ஊராட்சி துணைத் தலைவா் குறித்து கருத்து கேட்கும் கூட்டம் நடைபெற்றது. ஊராட்சி உறுப்பினா்களின் கருத்துகளை பதிவு செய்த வட்டாட்சியா், திண்டுக்கல் மாவட்ட ஆட்சியருக்கு அவற்றை அனுப்பி வைப்பதாகத் தெரிவித்தாா். இறுதி முடிவை, மாவட்ட ஆட்சியரே எடுப்பாா் என அதிகாரிகள் தெரிவித்துள்ளனா்.