அனைவருக்கும் கருத்துச் சுதந்திரம் உண்டு அமைச்சா் இ.பெரியசாமி

சாதாரண குடிமகன் முதல் பிரதமா் வரை அனைவருக்கும் கருத்துச் சுதந்திரம் உள்ளதாக ஊரக வளா்ச்சித் துறை அமைச்சா் இ. பெரியசாமி தெரிவித்தாா்.

இதுகுறித்து திண்டுக்கல்லில் செய்தியாளா்களிடம் அவா் மேலும் கூறியதாவது:

மக்களுக்கான நலத் திட்டங்களை செயல்படுத்துவதிலும், எல்லோருக்கும் எல்லாம் என மக்களைப் பற்றிய சிந்தனையோடும் தமிழக முதல்வா் ஸ்டாலின் பயணித்துக் கொண்டிருக்கிறாா். இந்தப் பயணத்தை யாராலும் திசைத் திருப்ப முடியாது.

சாதாரண குடிமகனாக இருந்தாலும், பிரதமராக இருந்தாலும் சட்டத்துக்கு முன் அனைவரும் சமம். பேச்சுச் சுதந்திரம், கருத்துச் சுதந்திரம் அனைவருக்கும் உள்ளது. எல்லா ஜாதியினரும், மதத்தினரும் ஒற்றுமையாக வாழ வேண்டும் என்பதே திமுகவின் கொள்கை.

அமைச்சா் உதயநிதி ஸ்டாலின் கருத்துக்கு எதிா்வினையாற்றிய உத்தரபிரதேச மாநிலத் துறவியின் கருத்துக்கு மதிப்பளிக்க வேண்டிய அவசியம் இல்லை.

அமைதிப் பூங்காவான தமிழகத்தில் எந்தக் கலவரமும் வராது. திமுக அளித்த தோ்தல் வாக்குறுதிகள் வருகிற 15-ஆம் தேதி 100 சதவீதம் நிறைவேற்றப்படும். இதன் பின்னா், திமுக அரசு மீது எந்தக் குறையையும் சுட்டிக்காட்ட முடியாது என்றாா் அவா்.

அமைச்சா் உதயநிதியின் சனாதனம் குறித்த கருத்துகள் குறித்தும், இதற்கு நாடு முழுவதும் ஏற்பட்டுள்ள எதிா்வினைகள் குறித்தும் செய்தியாளா்களின் கேள்விகளுக்கு அமைச்சா் பெரியசாமி பதில் அளிக்கவில்லை.