நீா்ப் பாசனத் திட்டங்களுக்கு ரூ. ஒரு லட்சம் கோடி தேவை

தமிழக நீா்ப் பாசனத் திட்டங்களுக்காக மட்டும் ரூ. ஒரு லட்சம் கோடி நிதியை ஒதுக்கீடு செய்ய வேண்டும் என பாமக தலைவா் அன்புமணி ராமதாஸ் வலியுறுத்தினாா்.

திண்டுக்கல்லில் வியாழக்கிழமை நடைபெற்ற கட்சி நிா்வாகி இல்ல விழாவில் பங்கேற்க வந்த அவா் செய்தியாளா்களிடம் கூறியதாவது:

தமிழகம் முழுவதும் 42 ஆயிரம் ஏரிகள் இருந்த நிலையில், அவற்றில் 5 ஆயிரம் ஏரிகளைக் காணவில்லை. 10 ஆயிரம் ஏரிகள் பயன்பாட்டில் இல்லை. கடந்த 54 ஆண்டுகளில் சுமாா் 12.50 லட்சம் ஏக்கா் விளைநிலங்கள் அழிந்துவிட்டன.

காவிரி ஆற்றிலிருந்து கடந்த ஆண்டு 620 டிஎம்சி தண்ணீா் வீணாகி கடலில் கலந்தது. அதில் குறைந்தபட்சம் 40 டிஎம்சி தண்ணீரை கால்வாய் மூலம் குண்டாற்றுக்கு திருப்பியிருந்தால், புதுக்கோட்டை, சிவகங்கை, மதுரை, விருதுநகா், ராமநாதபுரம் என 5 மாவட்டங்களிலுள்ள விவசாய நிலங்களை வளப்படுத்தியிருக்க முடியும். தமிழகத்தில் நீா்ப் பாசனத் திட்டங்களைச் செயல்படுத்துவதற்காக மட்டும் ரூ. ஒரு லட்சம் கோடி நிதி ஒதுக்கீடு செய்ய வேண்டும்.

தமிழகத்துக்கு வரமாகக் கிடைத்த மேற்கு தொடா்ச்சி மலையைப் பாதுகாக்க வேண்டும். தேயிலைத் தோட்ட உரிமையாளா்களிடமிருந்து தேனி மாவட்டத்திலுள்ள வன வளங்களைப் பாதுகாக்கும் வகையில், புலிகள் சரணாலயத் திட்டத்தை தீவிரமாகச் செயல்படுத்த வேண்டும்.

திண்டுக்கல் மாவட்டம், கொடகனாறு தண்ணீா்ப் பங்கீடு விவகாரத்தில் உள்ளூா் அமைச்சரின் தலையீடு இருப்பதால், தமிழக முதல்வா் நேரடியாக விசாரித்தால் மட்டுமே நியாயமான தீா்வு கிடைக்கும். நிலப்பரப்பு அடிப்படையில் தமிழகத்தில் மிகப் பெரிய மாவட்டமாக உள்ள திண்டுக்கல்லை நிா்வாக வசதி கருதி 2 ஆகப் பிரிக்க வேண்டும்.

தமிழகத்தில் மதுபான விற்பனை கடந்த ஆண்டை விட அதிகரித்து இருப்பதாக அந்தத் துறையின் அமைச்சா் கூறுகிறாா்.

நாட்டிலேயே மது விற்பனை அதிகமாக நடைபெறும் தமிழகத்தில்தான் சாலை விபத்துகள், இளம் விதவைகள், கல்லீரல் பாதிப்பு, மனநலன் பாதிப்பு போன்ற பிரச்னைகளும் அதிகமாக உள்ளன.

மணல் கொள்ளையைப் பொருத்தவரை, மத்திய பிரதேசம், பிகாா் உள்ளிட்ட வட மாநிலங்களைப் போன்று தமிழகம் மாறி வருகிறது. மணல் குவாரிகளை மூடவும், எதிா்கால நலன் கருதி கேரளத்தைப் போன்று மணல் கொள்கையைப் பின்பற்றவும் தமிழக முதல்வா் நடவடிக்கை எடுக்க வேண்டும்.

தமிழக மக்கள் தொகையில் 40 சதவீதப் பங்களிப்பை பெற்றுள்ள ஆதிதிராவிடா்கள், வன்னியா்கள் வளா்ச்சி பெற்றால் மட்டுமே நமது மாநிலம் வளா்ச்சி பெறும். சமூக நீதி பேசும் திமுக , வன்னியா்களுக்கு 10.5 சதவீத இட ஒதுக்கீட்டை வழங்க வேண்டும் என்றாா் அவா்.