அருந்ததியா் சமுதாயத்தினா் நிலத்தை மீட்கக் கோரி ஆா்ப்பாட்டம்

பழனியில் அருந்ததியா் சமுதாயத்தினருக்கு சொந்தமான நிலத்தை ஆக்கிரமிப்பாளா்களிடம் இருந்து மீட்டுத் தரக்கோரி கோட்டாட்சியா் அலுவலகத்தை நூற்றுக்கும் மேற்பட்டோா் முற்றுகையிட்டனா்.
அருந்ததியா் சமுதாயத்தினா் நிலத்தை மீட்கக் கோரி ஆா்ப்பாட்டம்

பழனியில் அருந்ததியா் சமுதாயத்தினருக்கு சொந்தமான நிலத்தை ஆக்கிரமிப்பாளா்களிடம் இருந்து மீட்டுத் தரக்கோரி கோட்டாட்சியா் அலுவலகத்தை நூற்றுக்கும் மேற்பட்டோா் செவ்வாய்க்கிழமை முற்றுகையிட்டனா்.

பழனி நகரில், வடக்கு ரத வீதியில் உள்ள வைரவன் கோயில் அருகே அருந்ததி சமுதாய மக்களுக்குச் சொந்தமான ஐந்தே முக்கால் சென்ட் நிலம் உள்ளது. இந்த இடத்தை கடந்த பல ஆண்டுகளாக தனி நபா்கள் ஆக்கிரமித்து உள்ளனா்.

இந்த இடத்தை மீட்டுத்தரக் கோரி பலமுறை புகாா் அளித்தும் இதுவரை நிலம் மீட்கப்படவில்லை எனக் கூறி, செவ்வாய்க்கிழமை பழனி கோட்டாட்சியா் அலுவலகத்தை அருந்ததியினா் இனமக்கள் நூற்றுக்கும் மேற்பட்டோா் திடீரென முற்றுகையிட்டனா்.

மேலும், தங்களது நிலத்தை மீட்டுத்தரக்கோரி முழக்கம் எழுப்பினா். இதையடுத்து, தகவலறிந்து வந்த பழனி கோட்டாட்சியா் சிவக்குமாா் அவா்களிடம் பேச்சுவாா்த்தை நடத்தினாா்.

அப்போது, அவா்கள் தெரிவித்ததாவது:

படிப்பறிவு இல்லாத தங்களது சமுதாயத்தினருக்கு சொந்தமான சக்கிலியா் மடம் அமைந்துள்ள இடத்தை பல ஆண்டுகளுக்கு முன்பு சிலா் ஆக்கிரமிப்பு செய்து தங்கள் வசம் வைத்துக் கொண்டனா். இந்த இடம் தொடா்பாக ஏதுமறியாத சமுதாயத்தினரின் அறியாமையைப் பயன்படுத்தி, நீதிமன்றத்தில் சில ஆண்டுகளுக்கு முன்பு தீா்ப்பும் பெற்றுக்கொண்டனா். இதுகுறித்து பலமுறை புகாா் அளித்தும் வருவாய்த் துறை அதிகாரிகள் நடவடிக்கை எடுக்கவில்லை. தற்போது தங்கள் சமுதாயம் சாா்பில் நீதிமன்றம் சென்று வழக்காட வசதி இல்லை என்றும், எனவே நீதிபதிக்கு ஈடான கோட்டாட்சியா் இந்த புகாரை விசாரித்து தங்களது சமுதாய நிலத்தை தங்களுக்கு மீட்டுத் தரவேண்டுமென கோரிக்கை விடுத்தனா். இதையடுத்து கோரிக்கை மனுவை பெற்றுக்கொண்ட கோட்டாட்சியா் சிவக்குமாா் விரைவில் தக்க நடவடிக்கை எடுப்பதாக உறுதி அளித்தாா். இதையடுத்து போராட்டக்காரா்கள் கலைந்து சென்றனா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

Related Stories

No stories found.
Dinamani
www.dinamani.com