இயற்கை விவசாயி கவிதாவுக்கு விருது

பழனியைச் சோ்ந்த இயற்கை விவசாயி கவிதாவுக்கு கோவையில் நடைபெற்ற மாநில உழவா் தினவிழாவில் ‘வேளாண் செம்மல்’ விருது வழங்கப்பட்டது.

பழனியை அடுத்த பழைய ஆயக்குடியை சோ்ந்தவா் இயற்கை விவசாயி கவிதா. இவா் நூற்றுக்கும் மேற்பட்ட பாரம்பரிய நெல் விதைகளை மீட்டெடுத்து அவற்றை இயற்கை முறையில் பயிரிட்டு வருகிறாா். மேலும், இவற்றின் மூலம் கிடைக்கும் விதைகளை விவசாயிகளைச் சந்தித்து, இவற்றின் முக்கியத்துவம் குறித்து விளக்கி, இவற்றைப் பயிரிடவும் உதவி செய்து வருகிறாா்.

மேலும், இயற்கை விவசாயிகளையும், வேளாண் விஞ்ஞானிகளையும் இவா் ஆண்டுதோறும் அழைத்து வந்து தனது தோட்டத்தில் பல்வேறு நிகழ்ச்சிகள் மூலம் இயற்கை உணவு வகைளை வழங்கியும், இயற்கை விவசாயத்தை ஊக்குவித்தும் வருகிறாா். ஈஷா, காவேரி கூக்குரல் உள்ளிட்ட பல்வேறு அமைப்புகளுடன் கவிதா இணைந்து மரம் நடுதலையும் மக்களிடையே கொண்டு சோ்த்து வருகிறாா்.

இந்த நிலையில், கோவை அரசு வேளாண் பல்கலைக்கழகத்தில் வியாழக்கிழமை நடைபெற்ற மாநில உழவா் தின விழா நிகழ்ச்சியில் கவிதாவுக்கு ‘வேளாண் செம்மல்’ விருதும், ரொக்கப் பரிசும் வழங்கி கெளரவிக்கப்பட்டது.

நிகழ்ச்சியில் தமிழக வேளாண் துறை அமைச்சா் பன்னீா்செல்வம், தமிழக மதுவிலக்கு, ஆயத்தீா்வைத் துறை அமைச்சா் முத்துசாமி, தமிழக செய்தி, விளம்பரத் துறை அமைச்சா் மு.பெ.சாமிநாதன், பொள்ளாச்சி தொகுதி மக்களவை உறுப்பினா் ஈஸ்வரசாமி, கோயம்புத்தூா் மாவட்ட ஆட்சியா் கிராந்திகுமாா் பாடி, கோயம்புத்தூா் மாநகராட்சி மேயா் ரங்கநாயகி, வேளாண் கல்லூரி துணைவேந்தா் கீதாலட்சுமி, நபாா்டு வங்கி தலைமைப் பொது மேலாளா் ஆனந்த், புதுதில்லி இந்திய வேளாண் காப்பீட்டு துணைப் பொது மேலாளா் ராம்மோகன் ரெட்டி உள்ளிட்டோா் கலந்து கொண்டனா்.