தேவாங்கு சரணாலயப் பணிகளை விரைந்து முடிக்க கூடுதல் தலைமைச் செயலா் அறிவுறுத்தல்

திண்டுக்கல்: அய்யலூா் வனச் சரகத்தில் தேவாங்கு சரணாலயம் அமைக்கும் பணிகளை விரைந்து முடிக்க அதிகாரிகளுக்கும் அலுவலா்களுக்கும் கூடுதல் தலைமைச் செயலா் சுப்ரியா சாஹூ திங்கள்கிழமை அறிவுறுத்தினாா்.

திண்டுக்கல் மாவட்டம், அய்யலூா் வனச் சரகத்துக்குள்பட்ட பண்ணமலை, தண்ணீா் கரடு, முடிமலை, தொப்பையசாமிமலை காப்புக் காடுகளிலும், நத்தம் வனச் சரகத்துக்குள்பட்ட சின்னயம்பட்டி காப்புக் காட்டிலும் மொத்தம் 51 இடங்களில் தேவாங்குகள் வசித்து வருகின்றன. நத்தம், அய்யலூா் மட்டுமின்றி, கரூா் மாவட்டம் கடவூா் வனச் சரகத்துக்குள்பட்ட வனப் பகுதிகளையும் ஒருங்கிணைத்து மொத்தம் 11,806 ஹெக்டேரில் தேவாங்கு வன உயிரினச் சரணாலயம் அமைக்கும் பணிகள் நடைபெற்று வருகின்றன.

இந்த நிலையில், கூடுதல் தலைமைச் செயலரும், வனத் துறையின் செயலருமான சுப்ரியா சாஹூ, அய்யலூா் வனச் சரகத்தில் திங்கள்கிழமை திடீா் ஆய்வு மேற்கொண்டாா். தேவாங்கு சரணாலயம் அமைக்கும் பணிகளையும், அய்யலூரில் சுற்றுலாப் பயணிகளுக்காக ஏற்படுத்தப்பட்டு வரும் உள்கட்டமைப்புப் பணிகளையும் விரைந்து முடிக்க வேண்டும் என அவா் அறிவுறுத்தினாா்.

வனத் துறையினா் நெகிழ்ச்சி: தொப்பையசாமிமலையிலுள்ள முடிமலை வனப் பகுதிக்கு வந்த கூடுதல் தலைமைச் செயலா் சுப்ரியா சாஹூவுக்கு, வனத் துறையினா் சாா்பில் அணிவகுப்பு மரியாதை நடைபெற்றது. இந்த அணிவகுப்பு மரியாதையில் 4 வனவா்கள், 13 வனக் காப்பாளா்கள் ஆகியோரிடம் பதவி, வனச் சரகம் உள்ளிட்ட விவரங்களை சுப்ரியா சாஹூ கேட்டறிந்தாா். மேலும், வனத் துறையினருடன் குழுப் புகைப்படமும் எடுத்துக்கொண்டாா். உயா் ஐஏஎஸ் அதிகாரி ஒருவா் நேரடியாகத் தங்களை அழைத்து நலம் விசாரித்தது, வனத் துறையினா் மத்தியில் நெகிழ்ச்சியை ஏற்படுத்தியது.