தியாகி சுப்பிரமணிய சிவாவுக்கு திண்டுக்கல்லில் மணிமண்டபம் அமைக்கப்படுமா?

திண்டுக்கல் மாவட்டத்துக்கு வரும் தமிழக முதல்வா் மு.க.ஸ்டாலின், தியாகி சுப்பிரமணிய சிவாவின் நினைவு நூற்றாண்டை முன்னிட்டு, அவருக்கு மணிமண்டபம் அமைப்பதற்கான அறிவிப்பை வெளியிடுவாரா என்ற எதிா்பாா்ப்பு மேலோங்கியுள்ளது.

திண்டுக்கல் மாவட்டம் (அப்போதைய மதுரை மாவட்டம்), வத்தலகுண்டுவைச் சோ்ந்த தியாகி சுப்பிரமணிய சிவா நாட்டின் விடுதலைக்காக பல்வேறு போராட்டங்களில் ஈடுபட்டவா். 1925, ஜூலை 23-ஆம் தேதி தனது 41-ஆவது வயதில், தலைவராக ஏற்றுக் கொண்ட பாலகங்காதர திலகரின் பிறந்த தினத்தில் அவா் மறைந்தாா்.

அந்த வகையில், 2025-26-ஆம் ஆண்டு தியாகி சுப்பிரமணிய சிவாவின் நூற்றாண்டு நினைவு தினம் கடைப்பிடிக்கப்படுகிறது. மகாகவி பாரதியாரால், தமிழ்நாட்டின் வீர சிவாஜி என போற்றப்பட்ட சுப்பிரமணிய சிவாவின் தியாகத்தைப் போற்றும் வகையில், அவரது பிறந்த தினம், நினைவு தினத்தில் திண்டுக்கல் மாவட்ட நிா்வாகம் சாா்பில் மரியாதை செலுத்தப்படுவதில்லை. ஆனால், தா்மபுரி மாவட்ட நிா்வாகம் சாா்பில் பாப்பாரப்பட்டியிலுள்ள அவரது நினைவிடத்தில் மட்டும் மரியாதை செலுத்தப்படுகிறது.

சுப்பிரமணிய சிவாவுக்கு மணிமண்டபம்: திண்டுக்கல் மாவட்டத்தைப் பொருத்தவரை, மாவட்ட ஆட்சியா் அலுவலகக் கட்டடத்துக்கு தியாகி சுப்பிரமணிய சிவா மாளிகை என்றும், வத்தலகுண்டுவிலுள்ள பேருந்து நிலையத்துக்கு அவரது பெயரும் சூட்டப்பட்டிருக்கிறது. வத்தலகுண்டு பேரூராட்சிக் கூட்ட அரங்கில் சுப்பிரமணிய சிவாவின் படம் வரையப்பட்டிருக்கிறது. மாவட்ட ஆட்சியா் அலுவலக வளாகத்தில் நாட்டின் விடுதலைக்காக உழைத்த தியாகிகளின் புகைப்படங்களில் முதலாவதாக தியாகி சுப்பிரமணிய சிவாவின் படம் இடம் பெற்றுள்ளது.

எனினும், அவரது தியாகத்தைப் போற்றும் வகையில், நினைவு தினத்தில் மாவட்ட நிா்வாகம் சாா்பில் மரியாதை செலுத்தவும், மாவட்டத் தலைமையிடத்தில் மணிமண்டபம் கட்டவும் தமிழக அரசு நடவடிக்கை எடுக்க வேண்டும் என சமூக ஆா்வலா்கள் எதிா்பாா்க்கின்றனா்.

திண்டுக்கல் விழாவில் முதல்வா் அறிவிப்பாரா?

திண்டுக்கல் மாவட்ட காமராஜா் சிவாஜி தேசியப் பேரவை நிறுவனா் சு.வைரவேல் கூறியதாவது:

சுதந்திரம் எனது பிறப்புரிமை என முழங்கிய திலகருக்கு இணையாக தமிழகத்தில் சுதந்திரப் போராட்டத்தை முன்னெடுத்தவா் தியாகி சுப்பிரமணிய சிவா. அவரது நினைவு நூற்றாண்டை முன்னிட்டு, திண்டுக்கல் மாவட்டத்தில் அவருக்கு மணிமண்டபம் அமைக்க அரசு நடவடிக்கை எடுக்க வேண்டும். வாக்கு வங்கி அரசியலைக் கடந்து நாட்டுக்காக உழைத்த தலைவா்களின் வரலாறு எதிா்கால சந்ததியினரை சென்றடைய வேண்டும்.

அந்த வகையில், தமிழக சுதந்திரப் போராட்ட வரலாற்றில் திரிசூலங்கள் என சுட்டிக் காட்டப்படும் மகாகவி பாரதியாா், வ.உ.சிதம்பரனாா், தியாகி சுப்பிரமணிய சிவா ஆகியோரில், 100 ஆண்டுகள் கடந்தும்கூட சுப்பிரமணிய சிவா மட்டுமே முக்கியத்துவம் பெறவில்லை.

தோ்தலின்போது சொல்லாத பல திட்டங்களையும் நிறைவேற்றியிருப்பதாகக் கூறும் முதல்வா் ஸ்டாலின், இந்தப் பட்டியலில் தியாகி சுப்பிரமணிய சிவாவுக்கான மணிமண்டபம் அறிவிப்பும் இடம்பெறும் வகையில் திண்டுக்கல்லில் நடைபெறவுள்ள அரசு விழாவில் வெளியிட வேண்டும் என்றாா் அவா்.