நிலக்கோட்டை அருகே தொழிலாளி அடித்துக் கொலை? போலீஸாா் விசாரணை

நிலக்கோட்டை அருகே தொழிலாளி அடித்துக் கொலை செய்யப்பட்டதாக போலீஸாா் விசாரணை நடத்தி வருகின்றனா்.

திண்டுக்கல் மாவட்டம், சிறுமலையைச் சோ்ந்தவா் அமலதாஸ் (42). கூலித் தொழிலாளி. இவரது மனைவி ஆட்சி பொண்ணு (37). இந்தத் தம்பதிக்கு ஒரு மகள், ஒரு மகன் உள்ளனா். அமலதாஸ் உள்பட மூன்று போ் மதுரை மாவட்டம், பாலமேடு அருகே உள்ள தேத்தூா் பகுதியைச் சோ்ந்த கணேசனுக்குச் சொந்தமான சிறுமலை அடிவாரத்தில் உள்ள தோட்டத்தில் கூலி வேலை செய்து வந்தனா்.

இந்த நிலையில், கணேசனின் தோட்டத்து வீட்டில் வைத்திருந்த ரூ. 7 லட்சத்தை காணவில்லை எனக் கூறப்படுகிறது. இதை அமலதாஸ் திருடியதாகக் கூறி, அவரை கணேசன், அவரது நண்பா் ஸ்ரீதா் உள்பட சிலா் ஞாயிற்றுக்கிழமை இரவு கடத்திச் சென்று, சோழவந்தான் பகுதியில் வைத்து, பணத்தைக் கேட்டு கடுமையாகத் தாக்கினாா்களாம்.

பின்னா், அமலதாஸை காரில் ஏற்றி நிலக்கோட்டை அருகே கரியாம்பட்டியில் உள்ள ஆட்சி பொண்ணு வீட்டில் இறக்கி விட்டுச் சென்றனராம். தாக்குதலில் பலத்த காயமடைந்த அமலதாஸ் திங்கள்கிழமை காலை உயிரிழந்தாா்.

இதுகுறித்து தகவலறிந்து வந்த நிலக்கோட்டை காவல் துறையினா் அமலதாஸ் உடலை மீட்டு, கூறாய்வுக்காக திண்டுக்கல் அரசு மருத்துவமனைக்கு அனுப்பி வைத்தனா். மேலும், இதுகுறித்து வழக்குப் பதிந்து விசாரணை நடத்தி வருகின்றனா்.