முதலீட்டாளா்கள் பணத்தை திருப்பிக் கொடுக்காமல் மோசடி: தனியாா் நிறுவனங்கள் மீது வழக்கு

முதலீட்டாளா்களின் பணத்தை திருப்பி வழங்காமல் மோசடியில் ஈடுபட்ட இரு தனியாா் நிறுவனங்கள் மீது பொருளாதாரக் குற்றப்பிரிவு போலீஸாா் வழக்குப்பதிந்து விசாரித்து வருகின்றனா்.

சிவங்கை மாவட்டம் இடையமேலூரைச் சோ்ந்த சொக்கலிங்கம் மகன் அா்ச்சுனன். இவா் யூனியன் வாலட் மற்றும் யூவி காா்ட் என்ற இணையதள வா்த்தக நிறுவனங்கள் நடத்திய கூட்டத்துக்குச் சென்றுள்ளாா். நிறுவனங்களின் இயக்குநா்கள், தங்களின் நிறுவனத்தில் முதலீடு செய்தால் அதிக லாபம் தருவதாகக் கூறியதை நம்பி, அா்ச்சுனன் ரூ.5.50 லட்சம் பணத்தை முதலீடு செய்தாராம்.

ஆனால் இயக்குநா்கள் கூறியபடி லாபத்தையும், அசலையும் கொடுக்கவில்லை. இதுகுறித்து அா்ச்சுனன் அளித்த புகாரின் பேரில் மதுரை பொருளாதார குற்றப்பிரிவு போலீஸாா் தனியாா் நிறுனங்களின் இயக்குநா்கள் ரேயான் ஜாய்சன், ரானவ் சியோடியா, சிவபிரசாத், கிருஷ்ண பிரசாத் ஆகியோா் மீது வழக்குப்பதிந்து விசாரித்து வருகின்றனா்.

மற்றொரு நிறுவனம்: இதேபோன்று மதுரை கரிசல்குளம் விளாங்குடியைச் சோ்ந்த காா்த்திகேயன் மனைவி கீதா, கீரின் டெக் என்ற தனியாா் நிறுவனம், முதலீடு தொகையை ஒரு வருடத்தில் இரட்டிப்பாகத் தருவதாகக் கூறியதை நம்பி, ரூ. 3.50 லட்சம்

முதலீடு செய்தாராம். ஆனால் அந்நிறுவனம் கூறியபடி பணத்தை கொடுக்கவில்லை.

இதுகுறித்து கவிதா அளித்தப் புகாரின் பேரில் மதுரை பொருளாதாரக் குற்றப்பிரிவு போலீஸாா், நிறுனத்தின் இயக்குநா்கள் அனிஸ் முகமது, சுப்பிரமணியன்சுகுமாா் உள்பட 3 போ் மீது வழக்குப்பதிந்து விசாரித்து வருகின்றனா்.

புகாா் அளிக்கலாம்: மேற்கண்ட தனியாா் நிறுவனங்களில் யாரேனும் முதலீடு செய்து ஏமாற்றப்பட்டிருந்தால், மதுரை விஸ்வநாதபுரம் பிரதான சாலையில் உள்ள பொருளாதாரக் குற்றப்பிரிவு (2) அலுவலகத்தில், அசல் ஆவணங்களுடன் நேரில் ஆஜராகி புகாா் அளிக்கலாம் என காவல் ஆய்வாளா் தெரிவித்துள்ளாா்.