திருப்பரங்குன்றம் ஊராட்சி ஒன்றியத்தில் மத்திய மானிய நிதிக்குழு சாா்பில் ஒதுக்கீடு செய்யப்பட்ட ரூ.2 கோடியே 2 லட்சத்து 74 ஆயிரத்து 447-க்கான திட்டப்பணிகள் செய்வது குறித்த சிறப்புக் கூட்டம் வியாழக்கிழமை நடைபெற்றது.
ஒன்றிய கூட்ட அரங்கில் நடைபெற்ற கூட்டத்திற்கு ஒன்றியத் தலைவா் வேட்டையன் தலைமை வகித்தாா். ஊராட்சி ஒன்றிய ஆணையாளா்கள் ஆசிக், பாண்டியன் ஆகியோா் முன்னிலை வகித்தனா்.
கூட்டத்தில் 15 ஆவது மத்திய மானிய நிதிக்குழு சாா்பில் ரூ. 2 கோடியே 2 லட்சத்து 74 ஆயிரத்து 447 நிதி ஒதுக்கீடு செய்யப்பட்டுள்ளது. அந்த நிதியில் ரூ.50 லட்சத்திற்கு குடிநீா் திட்டப்பணிகள், ரூ.50 லட்சத்தில் கழிவுநீா் கால்வாய்கள் பணிகள் செய்ய ஒதுக்கீடு செய்யப்பட்டுள்ளன. மேலும் மீதமுள்ள நிதியில் சிறுபாலங்கள், பேவா்பிளாக் சாலைகள், கட்டடங்களை கட்டலாம். எனவே ஒன்றியக் குழு உறுப்பினா்கள் தங்களது பகுதியில் செய்ய வேண்டிய பணிகள் குறித்து தெரிவிக்குமாறு ஆணையாளா் தெரிவித்தாா்.
கூட்டத்தில் அதிமுக ஒன்றியக் குழு உறுப்பினா் நிலையூா் முருகன் பேசியது: தற்போது கரோனா தீநுண்மி பரவலைத் தடுக்க ஊராட்சியில் செய்யப்படும் பணிகள் குறித்து ஒன்றியக் குழு உறுப்பினா்களுக்கு தெரிவிக்க வேண்டும். ஒன்றியகுழு உறுப்பினா்களின் பரிந்துரையின்பேரிலும் ஊராட்சிகளில் பணிகள் செய்ய வேண்டும் என்றாா்.
இதற்கு பதிலளித்து ஆணையாளா் பாண்டியன் கூறியது: இனி வரும் காலங்களில் ஊராட்சி செயலா்கள், ஊராட்சி மன்றத் தலைவா்கள் மற்றும் ஒன்றியக் குழு உறுப்பினா்களிடம் தெரிவித்து பணிகள் செய்யப்படும் என்றாா். கூட்டத்தில் ஒன்றிய துணைத்தலைவா் இந்திராஜெயக்குமாா், தவமணிமாயி உள்ளிட்ட பலா் பங்கேற்றனா்.