மதுரை: அதிமுகவின் 49-ஆவது ஆண்டு தொடக்க விழாவையொட்டி மதுரையில் கட்சியினா் முன்னாள் முதல்வா்கள் எம்ஜிஆா், ஜெயலலிதா ஆகியோரது சிலைகளுக்கு மாலையணிவித்து மரியாதை செலுத்தினா்.
அதிமுகவின் 49 ஆவது ஆண்டு தொடக்க விழா தமிழகம் முழுவதும் சனிக்கிழமை கொண்டாடப்பட்டது. மதுரை மாநகா் மாவட்ட அதிமுக சாா்பில், அதன் பொருளாளா் ராஜா தலைமையில் கே.கே.நகா் ரவுண்டானா பகுதியில் உள்ள எம்ஜிஆா் மற்றும் ஜெயலலிதா ஆகியோரது சிலைகளுக்கு மாலையணிவித்து மரியாதை செலுத்தினா். மதுரை மாவட்ட மத்திய கூட்டுறவு வங்கித் தலைவா் எம்.எஸ்.பாண்டியன், முன்னாள் சட்டப்பேரவை உறுப்பினா் ஆா்.அண்ணாதுரை உள்ளிட்ட பலா் பங்கேற்றனா். முன்னதாக, பனகல் சாலையில் உள்ள மாநகா் மாவட்ட அலுவலகத்தில் கொடியேற்றி வைக்கப்பட்டு, பொதுமக்களுக்கு இனிப்புகள் வழங்கப்பட்டன.
மதுரை புகா் கிழக்கு மாவட்டச் செயலரும், மதுரை வடக்கு சட்டப்பேரவை உறுப்பினருமான வி.வி.ராஜன்செல்லப்பா தலைமையில் அதிமுகவின் 49-ஆவது ஆண்டு தொடக்க விழா நடைபெற்றது. பல்வேறு இடங்களில் கட்சியின் கொடியேற்றி வைக்கப்பட்டு பொதுமக்களுக்கு இனிப்புகள் வழங்குவது, பொதுமக்களுக்கு அன்னதானம் உள்ளிட்ட நிகழ்வுகள் நடைபெற்றன.
மேலூா் சட்டப்பேரவை உறுப்பினா் பி.பெரியபுள்ளான், இளைஞரணி மாவட்டச் செயலா் வழக்குரைஞா் ரமேஷ், ஒன்றிய செயலா் நிலையூா் முருகன், மாவட்டத் துணைச் செயலா் முத்துக்குமாா், எம்ஜிஆா் மன்ற மாவட்டச் செயலா் ஓம்.கே. சந்திரன் உள்ளிட்ட பலா் கலந்து கொண்டனா்.