மதுரை மாவட்டம் கொட்டாம்பட்டி அருகே தனியாா் நிறுவனத்தினா் காரில் கொண்டு வந்த நகைகளை பறித்த சம்பவம் தொடா்பாக மேலும் 6 பேரை தனிப்படை போலீஸாா் திங்கள்கிழமை கைது செய்துள்ளனா். பறிக்கப்பட்ட166 பவுன் நகைகளும் மீட்கப்பட்டுள்ளன.
மதுரையில் உள்ள தனியாா் நகை அடகு நிறுவனத்தினா் விழுப்புரத்திலிருந்து காரில் 166 பவுன் நகைகள் மற்றும் ரொக்கம் ரூ.98,000 ஆகியவற்றுடன் மதுரைக்கு கடந்த 8 ஆம் தேதி வந்துகொண்டிருந்தனா். கொட்டாம்பட்டி அருகே அய்யாபட்டி விலக்கில், காரை வழிமறித்த கும்பல் ஊழியா் மைக்கேல்ராஜை அரிவாளால் தாக்கிவிட்டு, நகை, பணம் மற்றும் காருடன் தப்பியது.
இதுகுறித்து ஊழியா் மைக்கேல்ராஜ் கொட்டாம்பட்டி போலீஸில் புகாா் அளித்தாா். இதையடுத்து காவல் ஆய்வாளா் சிசுபாலன், சாா்பு- ஆய்வாளா்கள் ஆனந்த், குமரகுரு ஆகியோா் தலைமையில் மூன்று தனிப்படைகள் தீவிர தேடுதல் வேட்டையில் ஈடுபட்டனா்.
இந்நிலையில், கடந்த சில நாள்களுக்கு முன்பு வழிப்பறி கும்பலில் 5 பேரை போலீஸாா் கைது செய்து ஒரு பகுதி நகைகளை மீட்டனா். தொடா்ந்து நடைபெற்ற விசாரணையில் மேலும் 6 பேரை கைது செய்துள்ளனா்.
சிவகங்கை மாவட்டம் தூதை செந்தில், அவரது மனைவி கிருஷ்ணவேணி மற்றும் மதுரை, தஞ்சை, விழுப்புரம் பகுதிகளைச் சோ்ந்த வின்சென்ட் என்ற அருள் வின்சென்ட், நாராயணன், ஆனந்த் என்ற யோகாநாத், சதீஷ்குமாா், முத்துப்பாண்டி, மகேஸ்வரன், கேரளமணி என்ற மணிகண்டன், சேவுகன், ராஜ்குமாா் ஆகியோா் கைது செய்யப்பட்டுள்ளனா். காரில் நகை, பணம் கொண்டு செல்லப்படுவதை அறிந்த வழிப்பறி கும்பல் இச்சம்பவத்தில் ஈடுபட்டுள்ளதாக போலீஸாா் தெரிவித்தனா்.
பறிக்கப்பட்ட166 பவுன் நகைகளையும் போலீஸாா் மீட்டனா். இச்சம்பவத்தில் தொடா்புடைய மேலும் இருவா் தலைமறைவாக உள்ளனா். விரைவில் அவா்களும் கைதுசெய்யப்படுவாா்கள் என ஊரக மாவட்ட காவல் கண்ாணிப்பாளா் பாஸ்கரன் தெரிவித்தாா்.
ஜிபிஎஸ் கருவி பொருத்த எஸ்பி அறிவுரை: கொள்ளையா்கள் கடத்திச்சென்ற காரை சுக்காம்பட்டி அருகே போலீஸாா் கண்டுபிடித்து கைப்பற்றினா். கைப்பேசி கோபுரங்களில் பதிவான எண்கள், மற்றும் சி.சி.டி.வி. கேமரா பதிவுகள் தனிப்படை போலீஸாருக்கு உதவியாக இருந்தது. அதிக அளவு நகை, பணம் கொண்டு செல்லும் வாகனத்தில், முன்னும் பின்னும் கண்காணிப்பு கேமரா, ஜி.பி.எஸ். கருவி பொருத்தவும், பகல் நேரத்திலேயே வாகனம் புறப்பட்டு, குறிப்பிட்ட இடத்தை அடையவும், வழியில் எங்கும் நிறுத்தாமல் ஓய்வுபெற்ற ராணுவவீரா் பாதுகாப்புடன் செல்லவும் அறிவுறுத்தப்பட்டுள்ளது. குற்றவாளிகளில் இருவா் காயமுற்று சிகிச்சையில் உள்ளனா். கைது செய்யப்பட்ட அனைவரும் நீதிமன்ற காவலுக்கு அனுப்பப்பட்டுள்ளனா் என காவல் கண்காணிப்பாளா் செய்தியாளா்களிடம் தெரிவித்தாா்.