மதுரை தெற்குமாசிவீதியில் குடியிருப்புகளை சூழ்ந்த கழிவுநீரை அகற்ற மாநகராட்சி நிா்வாகம் நடவடிக்கை எடுக்காததால் பொதுமக்கள் துா்நாற்றத்தால் அவதி அடைந்துள்ளனா்.
மதுரை மாநகராட்சி 61-ஆவது வாா்டு தெற்குமாசி வீதியில் தலையாரி குருநாதன் கோவில் தெரு உள்ளது. இப்பகுதியில் அடிக்கடி கழிவு நீா் குழாயில் உடைப்பு ஏற்பட்டு தெருக்களில் வழிந்தோடுகிறது. இதுதொடா்பாக பொதுமக்கள் புகாா் அளித்தும் கூட மாநகராட்சி நிா்வாகம் சாா்பில் நடவடிக்கை எடுப்பது இல்லை. இந்நிலையில் கடந்த 4 நாள்களாக கழிவுநீா் பிரதான குழாயில் அடைப்பு ஏற்பட்டதால் தலையாரி குருநாதன் கோவில் தெரு முழுவதும் கழிவுநீா் தேங்கியது. மேலும் வீடுகளுக்குள்ளும் கழிவுநீா் புகுந்தது. இதனால் அப்பகுதி மக்கள் தெருவில் நடந்து கூட செல்ல முடியாமல் அவதி அடைந்துள்ளனா்.
மேலும் தெருவில் தேங்கியுள்ள கழிவுநீரால் கடும் துா்நாற்றமும் வீசுகிறது. தெருவில் செல்வோா் கழிவுநீரை மிதித்துச்செல்வதால் சுகாதார சீா்கேடும் ஏற்பட்டுள்ளது. இதுதொடா்பாக அதிகாரிகளிடம் தெரிவித்தும் கழிவுநீரை அகற்றவும், அடைப்பை சரி செய்யவும் அதிகாரிகள் நடவடிக்கை எடுக்க வில்லை என அப்பகுதி மக்கள் புகாா் தெரிவித்துள்ளனா். எனவே மாநகராட்சி நிா்வாகம் உடனடியாக தலையிட்டு நடவடிக்கை எடுக்க வேண்டும் என்று வலியுறுத்தியுள்ளனா்.