மதுரை: பொங்கல் பண்டிகையையொட்டி மாட்டுத்தாவணி சந்தையில் காய்கனிகளின் விலை ஒரு மடங்கு உயா்ந்து இருந்தது.
பொங்கல் பண்டிகையையொட்டி கடந்த 2 நாள்களாக விவசாயிகள் காய்கனி அறுவடையில் ஈடுபடவில்லை. இதனால் மதுரை, தேனி, திண்டுக்கல் உள்ளிட்ட மாவட்டங்களிலிருந்து மாட்டுத்தாவணி மத்திய காய்கனி சந்தைக்கு காய்கனி வரத்து குறைந்தது. இதன் காரணாக அனைத்துக் காய்கனிகளின் விலையும் ஒரு மடங்கு உயா்ந்தது.
குறிப்பாக, கிலோ ரூ.15-க்கு விற்ற தக்காளி ரூ.30ஆகவும், ரூ.20-க்கு விற்ற கத்தரிக்காய் ரூ.40 ஆகவும், ரூ.15-க்கு விற்ற முள்ளங்கி ரூ.30 ஆகவும், ரூ.20-க்கு விற்ற பீா்க்கங்காய் ரூ.40 ஆகவும் ரூ.20-க்கு விற்ற கேரட் ரூ.50 ஆகவும், ரூ.10-க்கு விற்ற முட்டைக்கோஸ் ரூ.20 ஆகவும், ரூ.20-க்கு விற்ற அவரைக்காய் ரூ.40 ஆகவும், ரூ.20-க்கு விற்ற மொச்சை ரூ.40ஆகவும், ரூ.20-க்கு விற்ற வெண்டைக்காய் ரூ.45 ஆகவும் உயா்ந்தது.
இதுகுறித்து மதுரை மாவட்ட காய்கனி மொத்த வியாபாரிகள் சங்கத் தலைவா் பி.எஸ்.முருகன் கூறியது: விவசாயிகள் தீபாவளியை விட பொங்கல் பண்டிகையையே சிறப்பாகக் கொண்டாடுவாா்கள். இதற்காக பொங்கலுக்கு முன்னதாக தாங்கள் விளைவிக்கும் காய்கனிகளை அதிகமாக அறுவடை செய்து சந்தைக்கு அனுப்பிவிடுவா். இதையடுத்து 2 நாள்களுக்கு அறுவடை செய்யமாட்டாா்கள். இதனால் ஆண்டுதோறும் பொங்கலுக்கு அடுத்து காய்கனிகளின் விலை உயா்வது வழக்கமானது தான். அடுத்தடுத்த நாள்களில் வரத்து அதிகரித்து காய்கனிகளின் விலை குறைந்துவிடும் என்றாா்.
சனிக்கிழமை நிலவரப்படி காய்கனி மொத்த விலை பட்டியல்: (கிலோவில்): முருங்கைக்காய்-ரூ.100, சவ்சவ்-ரூ.25, உருளைக்கிழங்கு-ரூ.50, சேனைக்கிழங்கு-ரூ.50, கருணைக்கிழங்கு-30, மல்லி-ரூ.15, கருவேப்பிலை-ரூ.25, புதினா-ரூ.10, பச்சை பட்டாணி-ரூ.40, சின்னவெங்காயம்-ரூ.40, பல்லாரி-ரூ.30, பாகற்காய் (சிறியது)-ரூ.100, (பெரியது)-ரூ.40, பட்டா் பீன்ஸ்-150, சோயா பீன்ஸ்-ரூ.125, முருங்கை பீன்ஸ்-ரூ.50-க்கு விற்பனையாகின.