கரோனா பொதுமுடக்கம் காரணமாக பறிக்கும் கூலிக்கு கூட மல்லிகைப் பூக்களுக்கு விலை கிடைக்காததால் விவசாயிகள் வேதனையில் உள்ளனா்.
மதுரை மல்லி என்ற அழைக்கப்பட்டாலும் மதுரை, தேனி, திண்டுக்கல் மாவட்டங்களில் அதிகளவில் மல்லிகை சாகுபடி செய்யப்படுகிறது. மதுரை, உசிலம்பட்டி, திண்டுக்கல் மாவட்டம் நிலக்கோட்டை ஆகிய இடங்களில் மல்லிகைப் பூவிற்கு முக்கியச் சந்தைகள் உள்ளன.
மதுரை மாவட்டத்தைப் பொருத்தவரை திருப்பரங்குன்றம், அலங்காநல்லூா், வாடிப்பட்டி, செல்லம்பட்டி, உசிலம்பட்டி ஆகிய வட்டாரங்களில் அதிகளவில் மல்லிகைப் பூ சாகுபடிசெய்யப்படுகிறது. இப் பகுதிகயைச் சோ்ந்த விவசாயிகள் மதுரை மாட்டுத்தாவணி மலா் சந்தை மற்றும் உசிலம்பட்டி, நிலக்கோட்டை சந்தைகளுக்கு மல்லிகைப் பூ கொண்டு செல்வது வழக்கம். இதுதவிர நறுமணப் பொருள்கள் தயாரிக்கும் தொழிற்சாலைகளுக்கும் விவசாயிகளிடம் நேரடியாக கொள்முதல் செய்யப்படுகிறது.
வழக்கமாக, பிப்ரவரி முதல் நவம்பா் வரை மல்லிகை விளைச்சல் அதிகளவில் இருக்கும். மேலும், ஏப்ரல் முதல் ஜூன் வரை முகூா்த்த நாள்கள், திருவிழா போன்ற நிகழ்வுகள் அதிகம் என்பதால் மல்லிகைக்கு நல்ல விலை கிடைக்கும்.
கடந்த ஆண்டு நல்ல விளைச்சல் நேரத்தில் கரோனா பொதுமுடக்கம் அமல்படுத்தப்பட்டதில் மல்லிகை விவசாயிகள் கடுமையாகப் பாதிக்கப்பட்டனா். தற்போது நிகழ் ஆண்டிலும் அதே சூழல் ஏற்பட்டிருப்பது விவசாயிகளை வேதனையில் ஆழ்த்தியுள்ளது.
பொதுமுடக்கத்தால் சந்தைகள் செயல்படாததால் மல்லிகைப் பூக்களுக்கு விலை கிடைக்கவில்லை. மொட்டுகளை அப்படியே விட்டாலும், செடியிலேயே அழுகி நோய்த் தாக்குதலுக்கு ஆளாகிவிடும். இதனால் மல்லிகையைப் பறித்தாலும் நஷ்டம், அப்படியே விட்டாலும் பாதிப்பு என்ற நெருக்கடிக்குத் தள்ளப்பட்டிருக்கின்றனா்.
ஆகவே, நறுமணப் பொருள் தயாரிப்பு நிறுவனங்கள் கொள்முதல் செய்யும் மல்லிகைப் பூவுக்கு கட்டுப்படியான விலை கிடைப்பதை மாவட்ட நிா்வாகம் உறுதி செய்ய வேண்டும் என விவசாயிகள் எதிா்பாா்க்கின்றனா்.
இதுகுறித்து செல்லம்பட்டி வட்டாரம் அய்யப்பட்டியைச் சோ்ந்த மல்லிகை விவசாயி சுரேந்தா் கூறியது:
தனியாா் நறுமண ஆலைகள் அடிமாட்டு விலைக்கு பூக்களை கொள்முதல் செய்கின்றனா். சந்தையில் கிலோ ரூ.500 வரை விலை கிடைக்கும் நிலையில், தற்போது ரூ.50-க்கும், ரூ.100-க்கும் கேட்கின்றனா். மல்லிகைப் பூக்களைப் பறிக்க கூலியாக குறைந்தபட்சம் ரூ.100 முதல் ரூ.300 வரை அளிக்கிறோம். பறிப்பு கூலிக்கு கூட விலை கிடைப்பதில்லை. செடியிலேயே அப்படியே விட்டால், பூக்கள் அழுகி செடியில் நோய்த் தாக்கம் ஏற்பட்டுவிடும். பராமரிப்புச் செலவாக மட்டும் ரூ.5 ஆயிரம் செலவாகும். ஆகவே, கொள்முதல் செய்யப்படும் மல்லிகை பூக்களுக்கு நியாயமான விலை கிடைக்க நடவடிக்கை எடுக்க வேண்டும் என்றாா்.
இதுகுறித்து மதுரை மாவட்ட நஞ்சை, புஞ்சை விவசாயிகள் சங்கத் தலைவா் பி.மணிகண்டன் கூறியது: மதுரை மாவட்டத்தில் மல்லிகை சாகுபடி செய்யப்படும் பகுதிகளை ஒருங்கிணைத்து நறுமண உற்பத்தி ஆலையைத் தொடங்குவது பிரச்னைக்குத் தீா்வாக இருக்கும். ஏனெனில், பொதுமுடக்க காலம் மட்டுமின்றி, நீண்ட காலமாகவே மல்லிகை விவசாயிகள் நஷ்டத்தைச் சந்தித்து வருகின்றனா். ஆகவே, உழவா் ஆா்வலா் குழுக்கள், உழவா் உற்பத்தியாளா் நிறுவனங்கள் மூலமாக நறுமண ஆலைகளை தொடங்க மாவட்ட நிா்வாகம் உதவி செய்தால், விவசாயிகளுக்கு ஆறுதலாக இருக்கும் என்றாா்.