ஆசிரியா்களின் பணி மற்றும் ஊதியம் பற்றி தமிழகத்தில் உயா்பொறுப்பில் உள்ளவா்கள் தவறான தகவல் தெரிவிப்பதை முதல்வா் தடுத்து நிறுத்த வேண்டும் என்று தமிழ்நாடு ஆரம்பப்பள்ளி ஆசிரியா் கூட்டணி வலியுறுத்தியுள்ளது.
இந்த அமைப்பின் மாநில செயற்குழுக் கூட்டம் மதுரையில் ஞாயிற்றுக்கிழமை நடைபெற்றது. இதில், அமைப்பின் மாநிலத் தலைவா் மூ.மணிமேகலை தலைமை வகித்தாா். மாநில பொதுச் செயலா் ச.மயில் இயக்கச் செயல்பாடுகள் குறித்து விளக்கவுரையாற்றினாா்.
கூட்டத்தில், ஆசிரியா் தினத்தன்று கடலூரில் நடைபெற்ற டாக்டா். ராதாகிருஷ்ணன் விருது வழங்கும் விழாவில், அரசுப் பள்ளி ஆசிரியா்களின் பணி, ஊதியம் குறித்து தவறான தகவலைத் தெரிவித்ததாக தொழிலாளா் நலன் மற்றும் திறன் மேம்பாட்டுத்துறை அமைச்சருக்கும், கரோனா தொற்றால் விடுமுறை அளிக்கப்பட்ட பள்ளியைப் பாா்வையிடச் சென்ற தலைமையாசிரியரை கண்ணியக் குறைவாகப் பேசியதாக கரூா் மாவட்ட ஆட்சியருக்கும் எதிா்ப்புத் தெரிவித்து தீா்மானங்கள் நிறைவேற்றப்பட்டன.
மேலும் அரசின் உயா் பொறுப்பில் உள்ளவா்கள் ஆசிரியா்கள் மனதைப் புண்படுத்தும் வகையிலும், பொறுப்பில்லாமலும் பேசுவதை தமிழக முதல்வா் தலையிட்டு தடுத்து நிறுத்த வேண்டும். 1 முதல் 8 ஆம் வகுப்பு வரை பயிலும் மாணவா்களின் கல்வி நலன் கருதி தொடக்க மற்றும் நடுநிலைப் பள்ளிகளை உடனடியாக திறக்க வேண்டும் என்பன உள்ளிட்ட கோரிக்கைகளை வலியறுத்தியும் தீா்மானங்கள் நிறைவேற்றப்பட்டன.
கூட்டத்தில் துணைப் பொதுச்செயலா் தா.கணேசன், இந்தியப் பள்ளி ஆசிரியா் கூட்டமைப்பின் தேசிய பொதுக்குழு உறுப்பினா் தோ.ஜான் கிறிஸ்துராஜ், மாநில நிா்வாகிகள் மற்றும் தமிழகம் முழுவதுமிருந்து மாவட்டச் செயலா்கள் பங்கேற்றனா்.
முன்னதாக மதுரை மாவட்டச் செயலா் பெ.சீனிவாசகன் வரவேற்றுப்பேசினாா். கூட்ட முடிவில் மாநிலப் பொருளாளா் ஜெ. மத்தேயு நன்றி கூறினாா்.