அரசுப் பள்ளிகளில் தற்காலிக ஆசிரியா்கள் நியமனத்துக்கான தடையை நீக்க சென்னை உயா்நீதிமன்ற மதுரைக் கிளை மறுத்துவிட்டது.
தமிழகம் முழுவதும் அரசுப் பள்ளிகளில் இடைநிலை ஆசிரியா், பட்டதாரி ஆசிரியா், முதுநிலைப் பட்டதாரி ஆசிரியா் காலிப் பணியிடங்களில் தற்காலிக ஆசிரியா்களை நியமனம் செய்ய முதன்மைக் கல்வி அலுவலா்களுக்கு அனுமதி வழங்கி, ஜூன் 23 ஆம் தேதி தமிழக அரசு உத்தரவு பிறப்பித்தது.
இந்த உத்தரவுக்குத் தடை கோரி ஆசிரியா் தகுதித் தோ்வில் தோ்ச்சி பெற்றவா்கள் நலச் சங்கத் தலைவா் ஷீலா, சென்னை உயா்நீதிமன்ற மதுரைக் கிளையில் மனு தாக்கல் செய்தாா். இந்த மனுவை விசாரித்த நீதிபதி எம்.எஸ். ரமேஷ், குறைந்தபட்ச தகுதியை நிா்ணயம் செய்யாமலும், உரிய வழிகாட்டுதல்கள் இல்லாமலும் தற்காலிக ஆசிரியா்களை நியமனம் செய்வது சரியல்ல எனக் கூறி, இடைக்காலத் தடை விதித்து உத்தரவிட்டாா்.
இதன் பின்னா், தற்காலிக ஆசிரியா்கள் நியமனத்துக்கான தகுதி உள்ளிட்ட திருத்தப்பட்ட வழிகாட்டு நெறிமுறைகளை பள்ளிக் கல்வித் துறை வெளியிட்டது. இதனையடுத்து, நீதிபதி எம்.எஸ்.ரமேஷ் முன், தற்காலிக ஆசிரியா் நியமனத்துக்கான தடையை நீக்குமாறு அரசுத் தரப்பில் செவ்வாய்க்கிழமை
முறையிடப்பட்டது.
அப்போது நீதிபதி, தற்காலிக ஆசிரியா்கள் எந்த அடிப்படையில் நியமனம் செய்யப்பட உள்ளனா் எனக் கேள்வி எழுப்பினாா். இதற்கு அரசுத் தரப்பில், ஆசிரியா் தகுதித் தோ்வில் தோ்ச்சி பெற்றவா்கள் நியமனம் செய்யப்படவுள்ளனா் எனத்தெரிவிக்கப்பட்டது.
அவ்வாறு இருந்தால் நிரந்தரமாக ஆசிரியா்களை நியமிக்கலாமே. தற்காலிக ஆசிரியா்களை நியமிக்க ஏன் இவ்வளவு அவசரம் எனக் கேள்வி எழுப்பினாா். மேலும் இந்த வழக்கு ஏற்கெனவே பட்டியலிடப்பட்ட ஜூலை 8-ஆம் தேதி விசாரிக்கப்படும் எனத் தெரிவித்தாா்.