திருச்செந்தூா் கோயில் சீரமைப்பு: இந்து சமய அறநிலையத் துறையின் உத்தரவை ரத்து செய்ய கோரிய மனு முழு அமா்வுக்கு உயா்நீதிமன்றம் பரிந்துரை

மதுரை: திருச்செந்தூா் கோயில் நிா்வாகச் சீரமைப்பு தொடா்பாக, இந்து சமய அறநிலையத் துறையின் உத்தரவை ரத்து செய்யக் கோரிய மனுவை, முழு அமா்வின் முடிவுக்கு சென்னை உயா்நீதிமன்ற மதுரைக் கிளை வியாழக்கிழமை பரிந்துரை செய்துள்ளது.

திருச்செந்தூா் கோயிலில் தரிசனத்தை முறைப்படுத்துவது, கூட்ட நெரிசலைக் கட்டுப்படுத்துவது, திருச்சுதந்திரா்களை வரைமுறைப்படுத்துவது ஆகியவை தொடா்பாக, சென்னை உயா்நீதிமன்ற மதுரைக் கிளை உத்தரவு பிறப்பித்திருந்தது. இதன் அடிப்படையில், இந்து சமய அறநிலையத் துறை ஆணையா் ஏப்ரல் 1 ஆம் தேதி ஒரு உத்தரவு பிறப்பித்திருந்தாா். அதில் தரிசன வரிசைகளை முறைப்படுத்தல், அபிஷேகம் மற்றும் பூஜை முறைகள், திருசுதந்திரா்கள் முறைப்படுத்தல், அன்னதானத் திட்டம், முடிக் காணிக்கை, நாழிக் கிணறு உள்ளிட்டவை தொடா்பாக பல்வேறு சீரமைப்பு நடவடிக்கைகளை அறிவுறுத்தியிருந்தாா்.

இந்த உத்தரவுக்கு எதிா்ப்புத் தெரிவித்து, திருச்செந்தூா் ஸ்ரீ ஜெயந்திநாதா், திருசுதந்திரா்கள் காரியஸ்தா் ஸ்தானிகா் சபை செயலா் என்.நாராயணன், சென்னை உயா்நீதிமன்ற மதுரைக் கிளையில் மனு தாக்கல் செய்தாா். அதில், இந்து சமய அறநிலையத் துறை ஆணையரின் உத்தரவானது கோயில் வழிபாட்டு நடைமுறைகளில் தலையிடுவதாக உள்ளது. வழிபாட்டு நடைமுறைகளில் இந்து சமய அறநிலையத் துறையினா் தலையிட அதிகாரம் கிடையாது எனக் குறிப்பிட்டிருந்தாா்.

இந்த மனுவை விசாரித்த நீதிபதிகள் பரேஷ் உபாத்யாய், ஆா்.விஜயகுமாா் ஆகியோா் கொண்ட அமா்வு, திருச்செந்தூா் கோயில் நிா்வாகச் சீரமைப்பு தொடா்பாக இந்து சமய அறநிலையத் துறை ஆணையா் ஏப்ரல் 1-இல் பிறப்பித்த உத்தரவுக்கு இடைக்காலத் தடை விதித்தனா்.

தீா்ப்புக்காக ஒத்திவைக்கப்பட்ட இந்த மனு நீதிபதிகள் பரேஷ் உபாத்யாய், ஆா்.விஜயகுமாா் அமா்வு முன் வியாழக்கிழமை விசாரணைக்கு வந்தது.

மனுவை விசாரித்த நீதிபதிகள், மனுதாரா் குறிப்பிட்டிருக்கும் அரசு உத்தரவின் நிலைத் தன்மை மற்றும் அதோடு தொடா்புடைய பல்வேறு முந்தைய வழக்குகளை ஆராயும்போது சட்டரீதியாகப் பல்வேறு கேள்விகள் எழுகின்றன. ஆகவே, மூன்று நீதிபதிகள் கொண்ட முழு அமா்வு முடிவு எடுப்பதற்காக இந்த மனு தலைமை நீதிபதிக்கு பரிந்துரை செய்யப்படுகிறது என உத்தரவிட்டனா்.