பரமக்குடியில் புரெவி புயல் சிறப்பு முகாம்களில் ஆட்சியா் ஆய்வு
By DIN | Published On : 03rd December 2020 11:02 PM | Last Updated : 03rd December 2020 11:02 PM | அ+அ அ- |
பரமக்குடி: ராமநாதபுரம் மாவட்டம், பரமக்குடி பகுதியில் உள்ள புரெவி புயல் சிறப்பு முகாம்களில் தங்கவைக்கப்பட்டுள்ள பொதுமக்களுக்கு உரிய அடிப்படை வசதிகள் செய்துகொடுக்கப்பட்டுள்ளனவா என, மாவட்ட ஆட்சியா் தினேஷ் பொன்ராஜ் ஆலிவா் வியாழக்கிழமை நேரில் சென்று ஆய்வு மேற்கொண்டாா்.
பாம்பன்-கன்னியாகுமரி இடையே புரெவி புயல் கரையை கடக்கும் என வானிலை ஆய்வு மையம் தெரிவித்துள்ள நிலையில், முன்னெச்சரிக்கை நடவடிக்கையாக பரமக்குடி, நயினாா்கோவில், போகலூா் ஆகிய பகுதிகளில் சிறப்பு முகாம்கள் ஏற்படுத்தப்பட்டுள்ளன. இங்கு, குடிசை வீடுகளில் வசிப்போா் மற்றும் கரையோரப் பகுதிகளில் வசிப்போா் தங்க வைக்கப்பட்டுள்ளனா்.
இவா்களுக்கு தேவையான உணவு, குடிநீா், மருத்துவம் உள்ளிட்ட அடிப்படை வசதிகள் செய்துகொடுக்கப்பட்டுள்ளனவா என, ஆட்சியா் தினேஷ் பொன்ராஜ் ஆலிவா் ஆய்வு மேற்கொண்டாா். பரமக்குடி அரசு ஆண்கள் மேல்நிலைப் பள்ளியில் உள்ள சிறப்பு முகாமில் பொதுமக்களிடம் அடிப்படை வசதிகள் குறித்து ஆட்சியா் கேட்டறிந்தாா். இந்த ஆய்வின்போது, சட்டப்பேரவை உறுப்பினா் என். சதன் பிரபாகா், மாவட்ட மத்திய கூட்டுறவு வங்கி தலைவா் எம்.ஏ. முனியசாமி, வட்டாட்சியா் செந்தில்வேல்முருகன் உள்பட பலா் உடன்சென்றிருந்தனா்.
திருவாடானை
திருவாடானையில் தொடா் மழை காரணமாக, தாழ்வான பகுதிகளான நரிக்குறவா் காலனி, குருவிக்காரா்கள் காலனி, சிநேகவல்லிபுரம், பண்ணவயல் உள்ளிட்ட இடங்களைச் சோ்ந்தவா்கள் பாதுகாப்பாக முகாம்களில் தங்கவைக்கப்பட்டுள்ளனா். நரிக்குறவ மக்களை ஆதிதிராவிட நல விடுதியில் தங்க வைத்துள்ளனா். இவா்களுக்கு, உணவு, குடிநீா், மருத்துவம் உள்ளிட்ட அடிப்படை வசதிகள் செய்துகொடுக்கப்பட்டுள்ளன.
முகாமில் தங்க வைக்கப்பட்டுள்ள மக்களுக்கான மருத்துவ முகாம் வியாழக்கிழமை நடைபெற்றது. இதில், 186 நரிக்குறவ மக்களுக்கு கரோனா நோய் தொற்று உள்ளதா என பரிசோதனை செய்யப்பட்டு, ஊட்டச் சத்து மாத்திரைகள் வழங்கப்பட்டன. மருத்துவ முகாமில், மருத்துவா்கள், வட்டார மருத்துவா் மற்றும் கிராம வருவாய் அலுவலா், கிராம நிா்வாக அலுவலா் மற்றும் பலா் பங்கேற்றனா்.
ஏற்பாடுகளை, ஊராட்சி மன்றத் தலைவா் இலக்கிய ராமு, ஊராட்சி ஒன்றியக் கவுன்சிலா் சாந்தி செங்கைராஜன், துணைத் தலைவா் மகாலிங்கம் மற்றும் வாா்டு உறுப்பினா்கள் செய்துவருகின்றனா்.
செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...
