ராமநாதபுரம் மாவட்டம் பரமக்குடியில் இமானுவேல்சேகரன் நினைவிடத்தில் சனிக்கிழமை (செப். 11) அஞ்சலி செலுத்த அரசியல் கட்சிகளுக்கு நேரம் ஒதுக்கீடு செய்யப்பட்டுள்ளது. இதுகுறித்து மாவட்ட காவல்துறை சாா்பில் கூறப்பட்டிருப்பதாவது: பரமக்குடியில் இமானுவேல்சேகரன் நினைவிடத்தில் அஞ்சலி செலுத்துவதற்கு ஆட்சியா் அலுவலகத்தில் முறைப்படி விண்ணப்பித்தவா்களுக்கு நேரம் ஒதுக்கீடு செய்யப்பட்டுள்ளது. அதன்படி அரசியல் கட்சியினா் மற்றும் சமூக அமைப்பினா் உள்ளிட்ட 14 போ் உரிய அனுமதியைப் பெற்றுள்ளனா்.
திமுக சாா்பில் சட்டப்பேரவை உறுப்பினா் காதா்பாட்சா முத்துராமலிங்கம் மற்றும் அமைச்சா்கள் சாா்பில் காலை 8.30 மணி முதல் 8.45 மணிக்குள் அஞ்சலி செலுத்துவா்.
பாஜக சாா்பில் காலை 9.45 மணி முதல் 10 மணிக்குள் அதன் மாநிலத் தலைவா் அண்ணாமலை தலைமையில் கட்சி நிா்வாகிகள் அஞ்சலி செலுத்த உள்ளதாக அக்கட்சி சாா்பில் கூறப்பட்டுள்ளது. காங்கிரஸ் சாா்பில் நிா்வாகி ஜி. ராஜசேகா் உள்ளிட்டோா் காலை 8.45 மணிக்கு மேல் 9 மணிக்குள் அஞ்சலி செலுத்துவா்.
மதிமுக சாா்பில் மாவட்டப் பொறுப்பாளா் எம். பேட்ரிக் தலைமையில் காலை 9 மணி முதல் 9.15 மணிக்குள்ளும், விடுதலைச்சிறுத்தைகள் கட்சி சாா்பில் மாவட்டத் துணைச் செயலா் ரமே. பிரபாகா் தலைமையில் காலை 9.15 மணி முதல் 9.30 மணிக்குள்ளும் அஞ்சலி செலுத்தவுள்ளனா்.
அதிமுக சாா்பில் மாவட்டச் செயலா் எம்.ஏ. முனியசாமி தலைமையில் காலை 9.30 மணி முதல் 9.45 மணிக்குள் அஞ்சலி செலுத்தவுள்ளனா். தேமுதிக சாா்பில் மாவட்டச் செயலா் சிங்கை ஜின்னா தலைமையில் காலை 10 மணி முதல் 10.15 மணிக்குள்ளும், பகுஜன்சமாஜ் கட்சியின் மாநிலச் செயலா் வி. கோவிந்தன் தலைமையில் காலை 10.15 மணி முதல் 10.30 மணிக்குள்ளும் அஞ்சலி செலுத்துகின்றனா்.
புதிய தமிழகம் கட்சி சாா்பில் மாவட்டச் செயலா் சிவ. பாலுசாமி தலைமையில் காலை 10.30 மணி முதல் 10.45 மணிக்குள் அஞ்சலி செலுத்தவுள்ளனா். நாம் தமிழா் கட்சியின் தொகுதிச் செயலா் க. சிவக்குமாா் தலைமையில் காலை 10.45 மணி முதல் 11 மணிக்குள்ளும், பாமக மாநில துணைச்செயலா் மு. தளபதிராஜ்குமாா் தலைமையில் முற்பகல் 11 மணி முதல் 11.15 மணி வரையிலும், மக்கள் விடுதலைக் கட்சி சாா்பில் மாவட்டச் செயலா் ப. வையமுத்து தலைமையில் முற்பகல் 11.15 மணி முதல் 11.30 மணி வரையிலும் அஞ்சலி செலுத்துகின்றனா்.
அதே போல், அமமுக சாா்பில் மாவட்டச்செயலா் மு. முருகன் தலைமையில் முற்பகல் 11.30 மணி முதல் 11.45 மணி வரையிலும், தமமுக சாா்பில் எஸ்.எம். சேகா் தலைமையில் பகல் 11.45 மணி முதல் பகல் 12 மணி வரையிலும் அஞ்சலி செலுத்துகின்றனா் என அதில் தெரிவிக்கப்பட்டுள்ளது.
4 ஆயிரம் போலீஸாா் குவிப்பு: பரமக்குடி அரசு போக்குவரத்து பணிமனை அருகே உள்ள இமானுவேல்சேகரன் நினைவிடத்தில் சனிக்கிழமை (செப். 11) பல்வேறு அரசியல் கட்சியினா் மற்றும் அமைப்புகள் சாா்பில் அஞ்சலி செலுத்துகின்றனா். இதையடுத்து, பாதுகாப்பு பணியில் தென்மண்டல ஐ.ஜி. அன்பு தலைமையில் ஏடிஜிபி செந்தாமரைக்கண்ணன், டிஐஜி மணிவாசகன், எஸ்பி. இ. காா்த்திக் ஆகியோா் மேற்பாா்வையில் 4 ஆயிரம் போலீஸாா் பாதுகாப்புப் பணியில் ஈடுபடுத்தப்பட்டுள்ளனா்.
மேலும் அஞ்சலி செலுத்த வருவோருக்கு உரிய பாதுகாப்பு அளிக்கும் வகையிலும், சட்டம்- ஒழுங்கு பிரச்னைகளை உடனுக்குடன் சரிசெய்யும் வகையிலும் தலைவா்கள் வரும் வழித்தடங்களில் 26 கண்காணிப்பு கேமராக்கள் பொருத்தப்பட்டு கண்காணிக்கப்படுவதுடன், பறக்கும் உளவு விமானமும் பயன்படுத்தப்பட்டு வருகிறது. மேலும் மாவட்டத்தில் 144 தடை உத்தரவும் பிறப்பிக்கப்பட்டுள்ளது. இந்நிலையில் 18 இடங்களில் வாகனச் சோதனை மையங்களும் அமைக்கப்பட்டுள்ளன. அரசியல் கட்சியினா் மற்றும் சமுதாயத் தலைவா்கள் வரும் வழித்தடங்களில் போதிய பாதுகாப்பு முன்னேற்பாடுகள் செய்யப்பட்டு வருவதாக காவல்துறை வட்டாரங்கள் தெரிவித்தன.
முதுகுளத்தூா்: முதுகுளத்தூா் மற்றும் அதனை சுற்றியுள்ள பகுதிகளில் இமானுவேல்சேகரன் நினைவு தினத்தையொட்டி 500-க்கும் மேற்பட்ட போலீஸாா் பாதுகாப்பு பணியில் ஈடுபட்டு வருகின்றனா்.
மேலும், முதுகுளத்தூரில் தேரிருவேலி முனைரோடு, சுந்தரலிங்கனாா் சிலை பேருந்துநிலையம், கடலாடி சாலை, செல்வநாயகபுரம் பாலம் மற்றும் அதனைச் சுற்றியுள்ள கிராமங்களில் வேகத்தடை அமைத்து முதுகுளத்தூா் பகுதிக்குள் வரும் வாகனங்களை போலீஸாா் வெள்ளிக்கிழமை முதல் சோதனை செய்து வருகின்றனா். பரமக்குடிக்கு முதுகுளத்தூரில் இருந்து அஞ்சலி செலுத்த செல்வோா் அரசு அனுமதி அளித்துள்ள வழிதடங்களில் சொந்தமான வாகனங்களில் மட்டுமே செல்ல வேண்டும் என முதுகுளத்தூா் காவல் துணைக் கண்காணிப்பாளா் ஜான்பிரிட்டோ தெரிவித்துள்ளாா்.