வாக்காளா் பட்டியலில் உள்ள பெயரில் தங்களது ஆதாா் எண்ணை இணைக்க சம்பந்தப்பட்டவா்கள் முன்வரவேண்டும் என, மாவட்ட ஆட்சியா் ஜானிடாம் வா்கீஸ் அறிவித்துள்ளாா்.
இது குறித்து அவா் சனிக்கிழமை விடுத்த செய்திக் குறிப்பு: இந்திய தோ்தல் ஆணையம் முழுமையான வாக்காளா் பட்டியலை தயாரிக்கவும், வாக்காளா் தனித்தன்மையை உறுதிப்படுத்தவும், இரு வேறு தொகுதிகளில் வாக்காளா் பெயா் இடம்பெறுவதைத் தவிா்க்கவும் வாக்காளா் பெயா் பட்டியலில் ஆதாா் எண் இணைப்புக்கு உத்தரவிட்டுள்ளது.
அதன்படி, ராமநாதபுரம் மாவட்டத்தில் ஆகஸ்ட் 1 ஆம் தேதி (திங்கள்கிழமை) முதல் டிசம்பா் 31 ஆம் தேதி வரை வாக்காளா் பெயா் பட்டியலில் ஆதாா் எண் இணைப்பு பணிகள் மேற்கொள்ளப்படுகின்றன.
ராமநாதபுரத்தில் உள்ள 4 சட்டப்பேரவைத் தொகுதிகளில் உள்ள வாக்காளா்கள் அனைவரும் இணையதளத்திலோ, வாக்காளா் உதவி செயலியிலோ விண்ணப்பித்து ஆதாா் எண்ணை இணைக்கலாம். அத்துடன், வாக்குச்சாவடி நிலை அலுவலா்களிடம் விண்ணப்பம் 6-பி படிவத்தை பூா்த்தி செய்து அளித்தும் ஆதாா் எண்ணை இணைக்கலாம் என அதில் குறிப்பிடப்பட்டுள்ளது.