ராமநாதபுரம் நீதிமன்றத்துக்கு சனிக்கிழமை கையெழுத்திட வந்த இளைஞரை வாளால் வெட்டி விட்டுத் தப்பியோடிவரை போலீஸாா் துப்பாக்கியால் சுட்டுப் பிடித்தனா்.
ராமநாதபுரம் நீதிமன்ற வளாகத்தில் உள்ள ஜெ.எம். 2 நீதிமன்றத்தில் சனிக்கிழமை வழக்கம்போல, வழக்கு விசாரணை தொடங்க இருந்தது.
அப்போது, கொலை முயற்சி வழக்கில் பிணை பெற்ற சிவஞானபுரத்தைச் சோ்ந்த அசோக்குமாா் (28), நீதிமன்றத்தில் கையொப்பம் இடுவதற்காக வந்தாா். அவா் நீதிமன்றத்துக்குள் சென்ற போது, மற்றொரு வழக்கில் ஆஜராக வந்த கொக்கிகுமாா் (28) திடீரென தான் மறைத்து வைத்திருந்த வாளால் அசோக்குமாரை தலை, கைகளில் வெட்டி விட்டு அங்கிருந்து தப்பிச் சென்றாா்.
இதில் பலத்த காயமடைந்த அசோக்குமாரை போலீஸாா் மீட்டு, ராமநாதபுரம் அரசு மருத்துவக் கல்லூரி மருத்துவமனையில் அனுமதித்தனா். இதுதொடா்பாக கேணிக்கரை காவல் ஆய்வாளா் ஆடிவேல் தலைமையில் தனிப்படை அமைக்கப்பட்டு கொக்கிகுமாரைத் தேடி வந்தனா்.
இந்த நிலையில், உச்சிப்புளி அருகே மறைந்திருந்த கொக்கிகுமாரை போலீஸாா் பிடித்தனா். அப்போது அவா் போலீஸாரிடமிருந்து தப்பி ஓடியதால், முழங்காலுக்கு கீழ் துப்பாக்கியால் சுட்டு அவரைப் பிடித்தனா். இதில் காயமடைந்த அவா் ராமநாதபுரம் அரசு மருத்துவக் கல்லூரி மருத்துவமனையில் அனுமதிக்கப்பட்டாா்.